Курманбек жана Феликс — революциянын эгиздери

Жазылуу
Кыргызстандын өткөн чагындагы эки башкы саясатчылары Курманбек Бакиев менен Феликс Куловдун урматына ысымдуу болушкан эгиз наристелер өлкөдө революция болуп жатканда жарыкка келишкен. Учурда алар 11 жашка чыгышты.

Кыргызстандын мурунку президенти Курманбек Бакиев менен мурунку премьер-министри Феликс Куловдун атын алган Курманбек жана Феликс Мирбекводор бүгүн 11 жашка толушту.

Бакиевге окшош таксист Кыргызстанда жашоону жакшы жакка өзгөртүүгө убада берди
Жеткинчектер 2005-жылдын 24-мартынан 25ине караган түнү төрөлүшкөн. Бул учурда Кыргызстанда курч окуялар болуп, кийин ал жоогазын революциясы деген аталышка ээ болгон.

Ал мезгилде Кыргызстандын тактан кулатылган туңгуч президенти Аскар Акаев өлкөдөн качып Москваны баш пааналаган. Анын ордуна шайлоого Феликс Кулов менен тандем болуп барган Курманбек Бакиев шайланган. Кулов анда өкмөттү жетектеген. 

Эки жылдан кийин алардын тандеминин таш-талканы чыгып, кызматтан алынган Кулов оппозицияны жетектеп, элди "Ала-Тоо" аянтына алып чыккан. Бир нече күндөн кийин митингчилерди күч түзүмдөрү көздөн жаш агызуучу газ менен кууп чыккан. Андан кийин Бакиев президенттик тактыда дагы үч жыл отуруп, 2010-жылы гана кулатылды.

Саясатчылардан айырмаланып алардын атын алган эгиздер Курманбек менен Феликс көп деле урушпай турганын апасы Назгүл Ташматова айтып берди.

"Бири-бирин дайым колдоп турушат. Курманбек Феликстен 20 мүнөткө улуу, андыктан өзүн агадай сезет. Үйдүн кожоюну да — ошол. Феликс ага караганда жумшак, тартиптүү. Мага көп жардам берет", — дейт эгиздердин энеси.

Эгиздер Юсуп менен Зулайка: өз жериңде жашоо кандай бакыт
Курманбек ушу тапта футболчу болууну кааласа, Феликс сот болгусу келет. Кимдин атын алып жүрүшөрүн да мыкты билишет. Премьер-министр деген ким экенин билбей калган Феликске апасы жардам берип, ал президенттен кийинки адам экенин түшүндүрүп берди.

Назгүл уулдарын өзү тарбиялай турганын, жолдошу менен 2006-жылы ажырашып кеткенин билдирди.

2005-жылдагы революцияны аталган үй-бүлө уулдардын туулган күнүнө даярдык көрүү менен белгилейт.

Жаңылыктар түрмөгү
0