Бишкек шаарынын тургуну жолбун иттерди куткарам деп үйүн таштап кеткен

Жазылуу
Валерий Паловников Бишкек шаарындагы батирин таштап, Арашан айылында кулайын деген үйдө жолбун иттер менен жашайт.

60 жаштын кырын ашкан Паловниковду коңшулары "Доктор Айболит" деп атап алышкан. Себеби, ал ооруган иттерди дарылайт.

Sputnik Кыргызстан маалымат агенттигинин кабарчысына ал кишилерге караганда иттерди жакшы көрөрүн мындайча түшүндүрдү.

"Бишкекте батирим бар. Бирок, жолбун иттерге кам көрүү үчүн аны аялым менен кызыма таштап кетүүгө аргасыз болдум. Мени көбү айнып калыптыр деп айтышат. Бирок мен ээлери таштап кеткен жолбун иттерге зээним кейийт. Көчөдө калган иттерди чогултуп, бул жактан дарылап, кайдыгер эмес кишилерге колуна өткөрүп берем", — дейт ал.

Паловников учурда жашап жаткан үйдү "жакшы адамдар" убактылуу баш пааналап тур деп бергенин кошумчалады. Бул жакта ал бир жылдан ашык жашаган. Ага чейин Бишкек шаарынын түрдүү райондорунда күн кечирген.

"Жакында эле үйдүн ээси бул жакты бошот деп айтты. Алар үйдү сатат экен. Иттерим менен кайда барарымды билбейм. Азыр башка жактарды караштырып жатам", — дейт ал.

Паловников бир канча жыл мурун омурткасын сындырып алгандыктан майып болгон. Ай сайын 5 миң сомдон алат. Анын көбүн иттерди дарылоого жумшайт. Азыр иттерди эмдетиш үчүн акча чогултуп жатат.

Жаңылыктар түрмөгү
0