Ал Sputnik Кыргызстан агенттигине берген маегинде футболго кантип келип калганын айтып берди.
Исакова футболго келгенге чейин каратэ жана балет менен алектенген. Каратэ до боюнча кара курдун ээси болууга да жетишкен.
"Бардыгы Амстердамга окууга баргандан кийин башталды. Окуудан тышкары кайрымдуулук уюмунда ыктыярчы болуп иштедим. Ошондой эле бизге өз курактуу балдарды сергек жашоого чакыруу үчүн спорт аянтчасын беришкен. Ал жактан футболго кызыгып калдым", — деди ал.
Ал дарбазага күтүлбөгөн жерден эле туруп калганын айтты.
"Башында сол капталдагы коргоочу болчумун. Былтыр жайкы сезондо биздин дарбазачы кыз оюн учурунда жаракат алып, мен анын ордуна турушум керек болуп калды. Андан кийин мени дарбазачы катары машыктыра башташты, өзүм да аракет кылдым", — деди Исакова.
Надира Кыргызстанга келгенде футбол сүйүүчүлөрдүн Asia Gold KG командасын түптөгөн.
