(1:55 / 14.44Mb / )

Сокулукта жыгач цехин иштеткен майыптар кантип жан багат? Иш учурундагы видео

174
(жаңыланган 20:05 29.09.2017)
Таалайгүл Усенбаева
Чүй облусунун майыптар коомунун 20га чукул мүчөсү Сокулук шаарынын маданият үйүнүн жер төлөсүндө жыгач цехин ачып, беш жылдан бери аны иштетип, жан багып келишет.

Бир четинен алаксып, экинчи жагынан өзүбүзгө каражат топтоп жатабыз деген эрки күчтүү, максаты бийик адамдар менен Sputnik Кыргызстан маалымат агенттигинин кабарчылары баарлашып, алардын жасаган эмгектерин көрүп келди.

Майыптар коомунун жетекчиси Эрнис Мыктыбек уулунун айтымында, учурда аталган ишканада 30 жаштан 50 жашка чейин ар түрдүү топтогу майып адамдар иштейт.

"Биздин коом 2005-жылы эле түзүлгөн. Башында бул цехти ачканга чейин колу билген майып балдарды чогултуп, ар кайсы жерде иштеп жүрдүк. Кийин 2012-жылы Сокулук райондук администрациясы тарабынан бул жер төлөгө жеттик. Биз келгенде бул жердин суусу агып, тамтыгы чыккан жай болчу. Эптеп ыктыярчылардын жардамы менен кичине өзүбүзгө ылайыктап жасап алдык. Азыр, кудайга шүгүр, бир ишкер жигитибиз жыгач кескен станок алып берген, ошо менен жан багып жатабыз", — деди Мыктыбек уулу.

Учурда алар отургуч, стол, ящик сыяктуу үй буюмдарын жасап, базарларга чыгып сатышат. Кээде буйрутма менен иштешет. Бирок андайлар аз дейт балдарга баш көз болгон цехтин башкы устасы Таалай Молдогазиев.

"Менин бул цехке келгениме үч жылдай болуп калды. Өзүм мурда заводдо, үйдөн ар кандай буйрутма алып иштедим, айтор, жөн отурбай үй-бүлөмдү багып келе жатам. Колум билгендиктен башка балдарга да устачылык өнөрдү үйрөтүп, бул жакта баш-көз болуп жүрөм. Өзүбүздө азыр материал жок болуп, жумуш да аз болуп калып жатат. Бирок ары-бери жактан демөөрчү карап жатабыз. Жакын арада бир бөлмөбүздү балдарга компьютердик класс ачып берели деп жасап жаткан чагыбыз", — деди Молдогазиев.

Жаш майыптар коомунун кийинки максаты өздөрүнө беш кабаттуу үй куруп, цехин мындан да кеңейтүү. Учурда алар тийиштүү жер тилкесин бөлдүрүп, Кызыл китебин алышкан. Болгону аны долбоорлоп, салып бергенге демөөрчү издешүүдө.

174
Белгилер:
жыгач, цех, майып, Сокулук, Чүй облусу
Тема боюнча
КРдин эң кымбат футболчусу бир буту жок Азис менен топ ойноду
Буту жок бала футбол ойноп интернетти жарды. Таланттуу Азистин тарыхы
Ноокендик азиз келин Лүтсия. Айылдын "109" кызматы, кассасы жана булбулу
Пикирлер