Бишкек — Нарын жолундагы Оттук айылынын тушунда саат 17:00дөр чамасында кроссовер менен кичиавтобус кагышканын күбө Sputnik Кыргызстан агенттигине билдирди.
Анын айтымында, кырсыктан улам жолтандабас трассанын жээгине чыгып калган.
"Ат-Башынын киши ташыган маршруткасы менен Subaru Forester үлгүсүндөгү автоунаа бетме-бет сүзүшүптүр. Бактыга жараша, кишилер тирүү. Жеңил жаракат алгандар бар. Аларга биринчи медициналык жардам көрсөтүлүп, Нарын шаарынын ооруканасына алып кетишти", — деди күбө.
Нарын облустук биргелешкен ооруканасы жалпысынан 11 киши келип түшкөнүн билдирди. Алардын колу-буту, кабыргасы сынган. Бактыга жараша, жол кырсыктан каза болгондор жок.
Ал эми облустук милиция жол кырсыгы болгонун тастыктап, ыкчам топ окуя болгон жерге чыгып кеткенин айтты.
