Аялдамада түкүрүнүп, тамеки тарткан милиционерди жетекчилик издөөдө. Видео

1545
(жаңыланган 10:26 10.11.2018)
Кадрдан милициянын формасын кийип турган киши коомдук жайда, тагыраак айтканда, аялдамада тамеки чегип, түкүрүнүп жатканын көрүүгө болот.

Аталган видеону "Бишкек сегодня" Telegram-каналына окурман жиберип, видеону 7-ноябрда болжол менен саат 12.50дө Байтик баатыр менен Скрябин көчөлөрүнүн кесилишиндеги аялдамадан тартып алганын айтты. Андан анча алыс эмес жерде Октябрь райондук милиция бөлүмү жайгашкан.

"Мына, укук коргоо органы ушинтип тазалыкты сактайт. Түкүрүүгө тыюу салган мыйзам качан күчүнө кирерин күтүп отурам. Эгер милиционерлер өздөрү эреже сактабаса, башкалардан эмнени күтсөк болот?" — деп нааразы болду видеонун автору.

Бул иш боюнча милиция кызматкерин административдик жоопкерчиликке тартуу үчүн кызматтык иликтөө башталып, өздүгү такталып жатканын Бишкек ШИИБден билдиришти.

Кыргыз Республикасынын административдик жоопкерчилик боюнча кодексинин "Жарандардын саламаттыгын тамекинин жана аны керектөөнүн зыяндуу таасиринен коргоо жөнүндөгү" мыйзамын бузгандарга 100-300 сом, кызмат адамдарына 1-2 миң сом айып салынат.

Белгилей кетсек, кийинки жылдан тарта коомдук жайда түкүргөн адамдарга 5,5 миң сом айып салуу мыйзамы күчүнө кирет.

Эгер ушул сыяктуу милиционерлердин кандайдыр бир укук бузууларын көрүп калсаңыз, ИИМдин Ички иликтөө кызматынын ишеним телефону (0704) 99-99-18 аркылуу кабарлаңыз.

1545
Белгилер:
милиционер, Тамеки тартуу, Бишкек
Тема боюнча
Бишкекте милиционер аймактык тескөөчүнү сабадыбы? ИИМдин жообу
Ноокатта "уктап жаткан" статистика бөлүмүнүн башчысы кызматтан алынды
Пикирлер