Мирлан Мурзаев кичинекей кезинде кандай бала болгонун ата-энеси айтып берди. Видео

Жазылуу
Sputnik Кыргызстан маалымат агенттиги футболчу Мирлан Мурзаевдин Кара-Балтада жашаган ата-энесине барып, анын балалыгы, спорттогу жолу, хоббиси тууралуу маектешип кайтты.

Футбол боюнча улуттук курама команданын чабуулчусу Мирлан Мурзаев Азия кубогунун алкагында Кыргызстан менен Бириккен Араб Эмирлигинин (БАЭ) беттешинде алгачкы голду киргизген.

Спортчунун ата-энеси Абдраим Мурзаев менен Жумагүл Исмаилова Кара-Балтада жашайт. 

Атасы уулунун чемпионаттагы ийгилигине кубанганынан көзгө жаш алганын айтып берди. 

"Оюнду телевизордон түз эфирден көрдүк. Мирлан гол киргизгенде абдан сүйүндүк. Ата катары "жаракат албай, жакшы ойноп берсе экен" дедим. Мен бир нерсени айтып берейин. Мирлан кичинекей кезинде тилине эки-үч жолу кара так пайда болгон. Биз алгач ширеңкенин кумун жалап алган го дегенбиз. Кимдерге гана көрсөтпөдүк. Атам ошондо "бул азиз (араб. — күчтүү, улуу урматтуу) бала. Урса, капа кылса болбойт. Кудай буюрса, мурзалардын уругунун даңкын көтөрөт" деген. Гол киргизгенде ошол сөз эсиме келип аябай ыйладым. "Азиз бала" деп кемпирлер да көп айткан", — деп сезимдери менен бөлүштү спортчунун атасы. 

Абдраим Мурзаев болочок футболчу жаш кезинде тентек болгонун айтып берди.

Полузащитник сборной КР Турсунали Рустамов - Sputnik Кыргызстан
Гол киргизген Турсунали Рустамов жаңы төрөлгөн кызын көрө элек. Атасынын маеги
"15 жыл Сүлүктүдө шахтада иштегем. 1994-жылы балдардын келечеги үчүн Кара-Балтага көчүп келгенбиз. Мирлан биринчи классында футбол менен баскетбол секциясына жазылган, кийинчерээк футболчу болууну чечти. Балам аябай тентек эле. Мектеп жыйынына баргандан коркуп турчубуз. Мугалимдер "Сүлүктүдөн келген Мурзаев профессордой келип-кетет" деп даттанчы. 10-классында мектептен чыгып алды. Бир күнү бизге айтпай эле башка мектептин директору менен сүйлөшүп, орус класска кирип алганын билдик", — деди Мурзаев.

Ошондой эле ал уулунун бош убакта эмне менен алектенерине токтолду.

"Мирлан экөөбүздүн үйдө төрт-беш бөдөнөбүз бар. Жумурткасына деле кызыкпайбыз. Үндөрүн угуп, кооздугуна суктанып туруу бакыт. Ал эми көгүчкөндөрдү мен Сүлүктүдө жүргөндө эле кармачумун. Кара-Балтадагы үйдүн чатырына бир көгүчкөн конуп калыптыр, анан бакыттын белгиси деп экинчисин алып келдик. Кийин Мирлан эки коробка көгүчкөн көтөрүп келиптир. Ошентип көбөйүп кетти. Канаттууну учуруп, ошондон ырахат алганга эмне жетсин. Мындан тышкары мал чарбачылык менен алектенебиз. Алабайларыбыз да короонун көркү", — деди футболчунун атасы.

Ал кошумчалагандай, Мирлан Мурзаев үч бир туугандын кенжеси. Агасы жана эжеси бар. Үй-бүлөлүү, бир кыздын атасы. 

Ушул тапта спортчу Азия кубогунун 1/8 финалындагы "мыкты голдун" ээси болуу үчүн ат салышууда.

Жаңылыктар түрмөгү
0