Абылгазиев: элибиз тартипти сагынып калганын бир күндө көрсөттү. Видео

1026
(жаңыланган 15:11 13.02.2019)
Өкмөт башчы долбоор 10 жылдан бери ишин баштай албаганына токтолуп, ага туура эмес түшүнүктөр, жетекчилердин көз карашы жана коррупциялык жеке кызыкчылыктар себеп болгонун белгиледи.

Жөнөкөй жарандан тартып мамлекет башчыга чейин "Коопсуз шаарды" ишке киргизүүгө абдан кызыкдар болду. Депутаттар да тиешелүү мыйзамдарды тез арада колдоп берип жатты. Бул туурасында премьер-министр Мухаммедкалый Абылгазиев ЖКККББнын мониторинг борбору менен таанышуу учурунда билдирди.

"Коопсуз шаар" долбоору 12-февралдан тарта ишин баштап, Бишкектин 10 кесилишине камера коюлган. Ал бир күндүн ичинде 761 эреже бузууну каттап, ага салынган айып пулдун суммасы 878 миң сомду түздү.

"Бул долбоор жарандарыбыздын коопсуздугу үчүн абдан маанилүү деп ойлойм. Соцтармакта иретке келтирилген каттамдардын видеосун бири-бирине жөнөтүп жатышат. Бул абдан кубанычтуу. Жарандарыбыз тартипке муктаж болуп, сагынып калганын көргөзүп турат. Долбоорду ишке ашырууда көп убакыт кетирип койдук. Ошон үчүн өкмөттүн атынан мекендештерден кечирим сурайм. Бирок эң башкысы, биз ишти баштап алдык", — деди Абылгазиев.

Өкмөт башчы долбоор 10 жылдан бери ишин баштай албаганына токтолуп, ага туура эмес түшүнүктөр, жетекчилердин көз карашы жана коррупциялык жеке кызыкчылыктар себеп болгонун белгиледи.

Маалыматка ылайык, жыл соңуна чейин Бишкектин 38 көчөсүнүн кесилишине жана башка чоң шаарларга, облустун борборлоруна, негизги трассаларга коюлат. Анын ичинде борбор калаадан Кара-Балта шаарынан Боом капчыгайына чейинки жолго, Ош — Бишкек трассасына коюлары айтылды.

1026
Белгилер:
жол эрежеси, тартип, долбоорлор, камера, Мухаммедкалый Абылгазиев, Коопсуз шаар
Тема боюнча
"Коопсуз шаар" тууралуу суроолорго жооп. Мониторинг борборунан видео
Эреже бузганына ынанбаган айдоочу кимге кайрыла алат