Асылбек Жээнбеков ТЭЦтин акчасын уурдагандардын жооп беришин талап кылды. Видео

963
(жаңыланган 17:49 14.02.2019)
Жогорку Кеңеш бүгүнкү жыйынында Бишкек ТЭЦинде болгон авариянын себептеринин иликтениши жана оңдоого кеткен 386 миллион доллар боюнча өкмөттүн маалыматын укту.

Бишкек ТЭЦин оңдоо боюнча келишимдер кабыл алынып жатканда Жогорку Кеңештин төрагасы болгон Асылбек Жээнбеков келишимдерди ак ниет менен чын дилден өлкө башчыларга ишенип колдогонун айтты. Ал аталган документтерди "тездетип бергиле, бул келишим керек" деп жогору жактан шаштыруу болгонун айтып, алар ким экени баарына түшүнүктүү экенин кошумчалады.

"Жогорку Кеңеш өзүнүн милдетин кынтыксыз аткарды, мындан ары да аткарат. Чын ниетибиз менен колдоп бердик, күттүк, сөздөргө ишендик, келишимдерге ишендик. Алар биз күткөндөй болбой калганын билген жокпуз. Кудай былтыр ушундай 25-30 градус суукту жиберди, авариядан кийин гана билип отурабыз, аны бардыгыбыз моюнга алышыбыз керек", — деди ал.

Жээнбеков ТЭЦтеги авариядан кийин гана Жогорку Кеңеш комиссия түзгөнүн айтып, анын ишинин жыйынтыгы менен бүгүнкүдөй иш-аракеттер болгону ачыкка чыгып жатканына токтолду.

"Жогорку Кеңеш ушул маселени аягына чыгаралы деп маселени койгонбуз. Ошондо дагы өкмөт "ведомстволор аралык комиссия түзөлү, депутаттар ошого кирсин, ошону менен эле жыйынтыктап коёлу" дешкен. Биз, Жогорку Кеңеш, ошондо да макул болбой, "биз колдоп бердик, уурдап кеткен окшойт, уурулар чыкса жооп берсин" деген бир эле маселени койдук. Жогорку Кеңештин комиссиясынын жыйынтыгы менен ушунун баары ачылып жатат", — деди ал.

Асылбек Жээнбеков бүгүн да ТЭЦтин айланасындагы иштерди башкаларга оодара салуу, башкаларды жаманатты кылуу үчүн аракеттер көрүлүп жатканын айтып, "уурулар жооп бериш керек, ким күнөөлүү болсо жооп берсин" деген талапты койду.

963
Белгилер:
келишим, ТЭЦ, Бишкек, Асылбек Жээнбеков
Тема:
ТЭЦ боюнча козголгон кылмыш иштер жана кармалгандар (61)
Тема боюнча
ТЭЦтеги авариянын чыныгы себеби жана чыгымы так айтылды
Жамшитов: ТЭЦти оңдоого жыл сайын бөлүнчү 400 млн. сомдун ичинен жеп турушкан