Бир жашар уулу менен кайыр сураган адамдын чоо-жайы белгилүү болду. Видео

2282
(жаңыланган 13:42 28.09.2019)
Бир жашар уулу менен кайыр сураган ата III топтогу майып. Анын кулагы укпайт, сүйлөй албайт. Каражаттын тартыштыгынан кенже уулунун операциясына көчөдө акча чогултууга аргасыз.

Кичинекей баласын көтөрүп алып кайыр сураган кишинин видеосу социалдык тармактарга чыгып, кызуу талкуу жараткан болчу.

Анын артынан Октябрь райондук ички иштер башкармалыгынын кызматкерлери түшүп, Аалы Токомбаев жана Байтик баатыр көчөлөрүнүн кесилишинде тилемчилик кылып жүргөн жаранды табышкан. Алар кайыр сураган адам жубайы менен ордо калаанын түштүк тарабындагы кичи райондо, бир бөлмөлүү батирде төрт баланы тарбиялашарын аныкташкан.

Социалдык кызматкерлер үй-бүлөнүн турмуш шарты менен таанышуу үчүн үйүнө барышкан.

Sputnik Кыргызстан маалымат агенттигинин кабарчылары да талкууга алынган үй-бүлөгө барып, алардын көчөдө кайыр сурашына эмне себеп болгонун тактап келишти.

Айдоочулардан акча сураган Таалайбек Ушумбаев 51 жашта. Ал төрт уулдун атасы. Бала кезинде менингит оорусуна чалдыгып, кулагы укпай, сүйлөбөй калганын кагазга жазып, кабарчыга түшүндүрүп берди. Жубайы да майып.

Ушумбаев кесиби боюнча темир уста экен. Акыркы иштеген жеринде маянасы 3000 сомдон ашпагандыктан жумушун таштап койгонун айтат. Учурда башка иш караштырып, бирок майнап чыкпай жатканын билдирди.

Анын үй-бүлөлүк кирешесин ай сайын берилчү 8000 сомго жетпеген жөлөк пул түзөт экен.

Төрт уулунун кенжесине Микаэль деген ысым беришкен. Үч айдан кийин эки жашка чыгат дейт Ушумбаев. Анын айтымында, бөбөктүн башына суу толуп, дарыгерлер бир жолу операция жасашкан.

Учурда чүрпөсүнүн дары-дармегине 20 000 сом керек болгондуктан көчөгө чыгып кайыр сурагандан башка амал калбаганын билдирди. Айтымында, Микаэлге тез арада жардам көрсөтүлбөсө, илдети өтүшүп кетиши ыктымал.

Sputnik кабарчысы аталган бүлөгө барганда үй кожейкеси социалдык кызматкерлер менен кеткени белгилүү болду.

2282
Белгилер:
медицина, операция, илдет, бала, майыптар, үй-бүлө
Тема боюнча
Аз камсыз үй-бүлөлөрдүн социалдык паспорту электрондоштурулду
Милиция бир жашар уулун көтөрүп кайыр сураган эркек кишини тапты