Коронавирустан улам борбор калаага 25-марттан тарта өзгөчө абал режими жарыяланган. Бишкекте дээрлик бардык объектилердин иши токтоду. Ушу тапта банктар, дарыканалар жана азык-түлүк дүкөндөрү гана иштеп жатат. Айрым кафелер буюртманы онлайн алып, тамакты үйгө жеткирип берүүгө өттү.
Элдин коопсуздугу үчүн бийлик көчөгө себепсиз чыкпай турууну өтүнүүдө. Борбор калаанын жашоочулары дүкөнгө, дарыканага жана ооруканага гана чыга алат. Жанында паспорт жана маршруттук баракча болууга тийиш.
Блокпосттордон улам көчөдө автоунаа да аз. Уруксат кагазы жок посттордон өтүү мүмкүн эмес. Экологдордун айтымында, автоунаалардын азайышынан улам шаардын абасы бир топ тазарган.
ӨА режимине карабастан шаарды жашылдандыруу иштери жүрүп жатат. Карантин уланган бир айдын ичинде Бишкек өзгөрдү. Борбордук бөлүктө гүлдөр отургузулса, жапжашыл болгон бак-дарактар жөн эле көздүн жоосун алат.
