Рысалиев 3 партия жаңы Ак үй салып берсин десе, депутаттар каткырышты. Видео

4001
(жаңыланган 20:22 04.11.2020)
Бүгүн жаңы төрага шайланып жаткан маалда, талкаланган Ак үйдү оңдоо маселеси Жогорку Кеңештин депутаттарын кызыл чеке талашка түшүрдү.

Бири имаратты өрттөгөндөрдү жоопко тартууну талап кылса, экинчиси элдик толкундоого өбөлгө түзгөн партияларга жаңы Ак үй салдыруу керектигин айтты. Үчүнчүсү "кайдагы бир көчөдөгү адамдар биздин Ак үйдү талкалап кетти" деп ызаланды.

Эл өкүлү Кожобек Рыспаев парламенттин имаратын талкалагандар азыр жыргап жүргөнүн айтып, жоопко тартылбаганына нааразы болду.

"Биз жоопкерчиликти сезбей жатабыз да. Ак үйдү талкалагандар жыргап жүрүшөт. Аларды жоопко тарткан эч ким жок. Жыргагандан отурабызбы, бул жерде кагазыбызды полго коюп алып. Мындай нерселерге кайдыгер болбой, жоопкерчилигин карабасак көнүмүш адатка айланат", — деп Рыспаев депутаттарга кайрылды.

Андан соң Зарылбек Рысалиев чыгып Ак үйдү талкалагандар эч нерсеси жок көчөдөгү балдар экенин белгиледи.

"Ошого эмне себеп болгонун баарыбыз билебиз да. Алар төрагалыкка көрсөтүлүп жаткан Талант Турмаматовичтин "Кыргызстан", "Биримдик" жана "Мекеним Кыргызстан" партиясы да. Ошол үч партиядан катышкан талапкерлердин эсебинен бир жаңы эле Ак үй салдырып албайлыбы. Кандай дейсиңер?" — деп сунуштады Рысалиев.

Коргоно албайт экенбиз. Жаңы төрага Мамытов Ак үйдүн тосмосун алууну сунуштады

Бирок депутат Евгения Строкова имаратты оңдоого бир тыйын дагы бербей турганын кошумчалады.

"Мен "Биримдикте" болгонума уялбайм. Мен эч кимге акча берген эмесмин. Биздин партияны мазактай көрбөңүз. Бардык партиялар акча таратты, бирок бардык талапкерлер эмес. Эгер сиз акча бердим деп эсептеп жатсаңыз, менин кабинетимдин эшигин оңдотуп коюңуз. Мен бир тыйын дагы бербейм. Себебин кесиптешим (Кожобек Рыспаев — ред.) туура айтты, кайдагы бир көчөдөгү адамдар биздин Ак үйдү талкалап кетишти", — деди Строкова.

Белгилей кетсек, 6-октябрдагы элдик толкундоо маалында Жогорку Кеңештин имараты талкаланып, учурда депутаттар жыйындарын "Ала-Арча" мамлекеттик резиденциясында өткөрүүдө. Депутат Акылбек Жапаров аны оңдоого 450 миллион сом керектелерин айткан, бирок президенттин милдетин аткаруучу Садыр Жапаров 10 миллион сом гана талап кылынарын билдирүүдө.

4001
Белгилер:
жаза, оңдоо, Зарылбек Рысалиев, депутат, Ак үй
Тема боюнча
Бийлик кантип алмашты? Соңку окуялардагы урунттуу учурлар
Жапаров премьерге кеңешчи болгонун айтса, Бакиров какшыктап күлкүгө салды. Видео
Депутаттар кийинки парламенттик шайлоого чейин маяна албай иштей турган болушту

Антонина Шевченконун учакты башкарып, асманда калкыган видеосу

246
UFC уюмунун кыргызстандык мушкери Антонина Шевченко бир моторлуу учакты өзү баштарып, чакан авиациядагы жолу тууралуу кеп кылган берүү даярдалды.

"Путь Пилота" YouTube каналына "Пантера" каймана аты бар мушкер кыздын чакан авиациядагы жолу, өзү сатып алган учагы жана кантип учкуч болуп калгандыгы тууралуу айтып берди.

Спортчунун айтымында, ага учкуч болуу идеясы келгенине көп болгон. Бирок ал кыялын ишке ашырууну АКШга барганда көздөй баштаган. Былтыр февраль айында Лас-Вегас шаарында учкучтар мектебине барган. Алгачкы ирет сентябрь айында өз алдынча учуп, декабрда жеке учкучтун сертификатын алган.

Антонина Шевченко — UFC уюмунун кыргызстандык мушкери, белгилүү спортчу Валентина Шевченконун бир тууганы.

246
Белгилер:
Берүү, видео, Учкуч, Антонина Шевченко
Тема боюнча
Майянын кашын жарып салды. Шевченко чемпиондугун коргогон беттештин видеосу

Айла кетип, балдардын кийимин тигип сата баштадык. Ракка чалдыккан аялдардын бизнеси

549
(жаңыланган 18:29 24.11.2020)
Sputnik Кыргызстан агенттиги рак илдети менен алышкан кыздардын химиотерапиясына акча чогултуп жаткан аялдардын иши менен таанышып келди.

Ракка кабылган кыз-келиндердин өнөрканасында жумуш кечинде башталат. Күндүз айрымдары башка жумуштарда иштеп келишет да, кечинде бир бөлмөлүү чакан цехке чогулушат. Азыр алар балдардын жылуу кийимдерин тигип жаткан кездери.

"Жашоо үчүн бирге" коомдук фондунун төрайымы Шайырбү Сагынбаеванын айтымында, түшкөн каражат рак менен азыркы тапта алышып жаткандардын химиотерапия, дары-дармегине жумшалат.

"Бул оору каражатты абдан көп талап кылат. Биздин тагдырды акча гана чечет. Жакында эле Назико деген жапжаш кыз ушул дарттан каза болду. Каражаты жок үч химиотерапиясын өткөрүп жибериптир. Бизге кеч кайрылып калды. Ал учурда пандемия болуп экобаштыктарыбыз да өтпөй жаткан. Бет кап тигип, дарыканалардан карызга дары алып болгон аракетибизди кылдык. Бирок оору өтүшүп кеткендиктен каза болуп калды. Азыр түшкөн акча менен ошол карызды жаап жатабыз", — деди Сагынбаева.

Бет кап, экобаштык өтпөй калганда алар балдардын кийимин тиге башташкан. Сагынбаева азыр кардарлар көбөйүп, буюртма көп түшө баштаганын белгиледи.

"Кийимдер жылуу, ыңгайлуу. Баасы 1000 сомдон 1500 сомго чейин. Азыр кээ бири үй-бүлө мүчөлөрүнүн баарына буюртма берип жатышат. Мындан улам чоңдорго да буюртма менен тиге баштадык. Карыздан кутулгандан кийин өзү арабада отурган жалгыз бой Ира деген аялдын дары-дармегин алып берип, химиотерапиясынын акысын төлөөгө жардам беребиз. Ал дагы ракка кабылып, жакында эле жардам сурап келди. Ирага айына 100 миң сомдой акча керектелет", — деди Сагынбаева.

Бейтап аялдарды түйшөлткөн дагы бир маселе — дарылардын асман чапчыган баасы. Айгүл Кыдырмышеванын айтымында, рактын дарысы ортомчулар менен Кыргызстанга келгиче өз баасынан эки-үч эсе кымбат болуп кетет. Мындан улам алар өкмөттөн социалдык дарыкана ачып коюуну суранышты.

"Көбүнүн акчасы жок, убагында дарыларын ичпей, химиотерапиясын албай бейтаптар каза болуп калып жатышат. Ошол себептен социалдык дарыкана ачып коюуну суранабыз. Анда дарылар чет өлкөдөн кайсы баа менен келсе, ошол нарк менен сатылат. Азыр бизде рактын дарыларын он эсе кошуп сатып жатышпайбы. Ошондуктан аялдардын ал дарыга акчасы жетпей, ала албай калышууда", — деди Кыдырмышева.

Ракты жеңгендердин бири Жылдыз Жапар кызы өнөрканага айрым аялдар ичиндеги букту чыгарып алыш үчүн келишет дейт. Анын айтымында, ооруган аялдар бири-бирин жакшы түшүнөт, кыйналып жатса бири-биринен жардамын аябайт.

"Цехке келгенден кеткенге чейин сөзүбүз да, күлкүбүз да тыйылбайт. Кадимкидей эс алып калабыз, көпкө көрүшпөсөк сагынышып кетебиз. Көп эле аялдар бул жакка келип ичиндеги айта албай жүргөн нерселерин айтып, ачылышат. Өзүм негизи аскер кызматкери болчумун. Пенсияга чыккандан кийин ооруп калып, дарттын азабын тарттым. Бирок жакындарымдын колдоосу менен жеңип, кийин ушул фонд менен аралашып иштешип калдым. Азыр колум бош болсо эле цехке келем", — деди Жапар кызы.

Рак менен ооруган кыз-келиндер үчүн биринчи кезекте жакындарынын колдоосу, анан каражат керек дейт Шайырбү Сагынбаева. Ал ооруп калган аялдарын таштап кеткен эркектер көп экенин айтып кейиди.

549
Белгилер:
онкология, кайрымдуулук, кийим, бала, оору, рак
Тема боюнча
Өзгөчө кыз-келиндердин чүрөктөй сүрөтү менен жүрөк тилген баяны
Ак жарык. Канададан баштыкка буюртма берип, өмүр узарткан мекендештер
Көчөдө беткап кийип бараткан кишилер. Архивдик сүрөт

Адис: коронавирус сасык тумоо менен грипптин катарына кошулуп келе жатат

0
"Роспотребнадзор" мекемесинин башчысы Анна Попова COVID эми жыл сайын суук түшкөн маалда келе берет деп божомолдоодо.

БИШКЕК, 25-ноя. — Sputnik. Коронавирус акырындык менен грипп, сасык тумоо сыяктуу сезондук инфекциялардын катарына кошулуп бара жатат. Бул тууралуу "Роспотребнадзор" мекемесинин башчысы Анна Поповага шилтеме берип РИА Новости жазды. 

"COVID-19 башка вирустардай эле сезондук инфекцияга айланып бара жатат. Менимче, ал жыл сайын күн сууктаган маалда активдешет", — деди Попова.

Ал ортодо Дүйнөлүк саламаттык сактоо уюму 2021-жылдын башында Европада коронавирустун үчүнчү толкуну боюнча коркунуч бар экенин эскертти.

Дүйнө жүзү боюнча алсак, коронавирус жуктургандардын саны 60 миллионго чукулдап калды. Бейтаптардын саны боюнча алдыңкы орундарда АКШ (12,5 миллион), Индия (9 миллион) жана Бразилия (6 миллион) мамлекеттери келе жатат.

0
Белгилер:
сасык тумоо, грипп, коронавирус, Дүйнө
Тема:
Дүйнөгө жайылган коронавирус
Тема боюнча
Сагыз чайнаба, тамак ичпе! Коронавируска тест тапшырарда билип алчу эрежелер