Буюртмага муктажбыз! Сокулуктук майып усталардын өнөрү видеодо

394
(жаңыланган 15:25 30.01.2021)
Сокулук районундагы Маданият үйүнүн жер төлөсүндө иштеген ден соолугунан мүмкүнчүлүгү чектелген жаштар учурда тактайдан үйгө керектүү түрдүү буюмдарды жасашат. Sputnik Кыргызстан агенттигинин кабарчысы алардын ишмердүүлүгү менен таанышып келди.

Чакан ишканадагылардын басымдуу бөлүгү ар кыл топтогу майыптыгы бар адамдар. Ал жактагылардын көпчүлүгү кол куушуруп жөн отурбастан, суук жерде иштеп түрдүү буюртмаларды аткарып, тапкан акчасына үйлүү болcок дегенде эки көзү төрт.

Ар кандай курактагы усталар кожойкелерге керектүү майда-барат оокаттардан баштап үй эмеректерине чейин жасашат. Бирок алар бир нече жумадан бери буюртманын жоктугунан толук кандуу иштей албай келүүдө.

Цехте эмгектенгендердин бири 32 жаштагы Бакытбек Көккөзовдун айтымында, усталардын көпчүлүгү батир ижаралап же жакындарыныкында жашайт.

"Элден акча сурабай, цехте иштеп бала-бакырабызды багып жатабыз. Уюлдук телефон койгуч, отургуч, шкаф, ашкана эмеректеринин түрүн жасайбыз. Жумушта бири-бирибизге кол кабыш кылып, үйрөтүп турабыз. Буюрса ишибиз жылышып буюртма көп түшсө, үйлүү болуп алсак деген көптөн күткөн тилегибиз бар. Анткени бул жактагылардын көпчүлүгү акча төлөп батирде же жакындарыныкында жашайт, уул-кыздары да жок эмес", — деди Көккөзов.

Жыгач усталар жасаган ишине жараша айына 5000 сомдон 10 миң сомго чейин айлык алат. Майыптардын айрымдарына ал каражат негизги киреше булагы болсо, дагы бири үчүн өзүн алаксытып коомго аралашуусуна түрткү болгон шарт.

Чүй облустук жаш майыптар коомунун жетекчиси Эрнис Мыктыбек уулу турак жайлуу болгусу келген майыптар ашар жолу менен үй салып жаткандыгын да айтты.

"Цехте иштеген адамдар курулуш иштеринин ыгын билет, колдорунан көп нерсе келет. Буга чейин колунда бар бир адам бизге жер тилкесин берген. Өткөн жылы ал жерге өз күчүбүз менен жапа тырмак үй куруп, бир майып үй-бүлөнү киргиздик. Эми ошол эле ыкма менен дагы курулуш иштерин жасап мүмкүнчүлүгү чектелгендерди үйлүү кылалы деп максат коюп жатабыз. Себеби катарыбызда үй-жайы жоктор толтура. Ошондуктан чакан болсо дагы керектүү жер аянтын табуу зарыл болуп жатат", — деди ал.

Аталган коомго Чүй облусундагы үч жаштан 75 жашка чейинки курактагы 1200гө жакын тургун кирет. Алардын басымдуу бөлүгү ишсиз отурат.

394
Белгилер:
видео, ишкана, уста, майыптар, Кыргызстан
Тема боюнча
Бишкекте мөөнөтү өткөн конфет-печенье сакталган дагы бир кампа табылды. Видео
Бишкектен балдарга деп эскирип кеткен таттуу-тарапа саткан кампа табылды. Видео

Бир айыл 5 уулун жоготту. Турдубайдын чек арада окко учканын 4 баласы биле элек

184
(жаңыланган 17:11 06.05.2021)
Балдары көчө чаң ызгыта ойноп, күлкүсү жаңырчу Кара-Бак айылында энелердин көз жашы төгүлүп, боздогон ыйы угулуп жатат. Кыргыз-тажик жаңжалында бул айылдан беш жигит набыт болгон. Алардын бири 33 жаштагы Турдубай Саттаров.

Ал чыр чыккан күнү кечинде көзү өтүп кеткен атасына куран окутуп, ооз ачырмак. Эртең менен базарга барып азык-түлүк алып жүргөндө тажик тарап "Головной" суу бөлүштүрүүчү жайын "басып алган жатат" деп уккан. Бирок ал учурда акыркы суусун ичип жатканын билген эмес. Тилекке каршы, кечинде атасына куран окутуунун ордуна өзү шейит кетти.

Sputnik Кыргызстандын кабарчылары барганда маркумдун апасы үйүндө өзүнө келе албай жатканын айтышты. Ал эми балдары атасынын көз жумганын биле элек экен.

Маркумдун агасы (атасынын бир тууган иниси) Илияз Саттаров Турдубай суунун башында окко учканын айтат.

"Базардан алган азык-түлүгүн үйгө алып келип таштап, кайра "Головнойго" бараткан машинанын артынан өзүнүн унаасы менен кууп барып, чыгып кетиптир. Унаасын тээ май куюучу жайдын жанына калтырган экен. Булар барганда эле куралчан тажиктер атып, кырып салыптыр да. Турдубай иним токтоо, кичи пейил, адамгерчиликтүү, бүт эл-журтка, туугандарга күйүмдүү эле. Ушуга чейин бир жерде бейчеки басканын көргөн жокмун", — деди Саттаров.

Турдубай Саттаровдун артында жубайы Кайры Абдирашит кызы чиедей бир уул, үч кызы менен калды.

"Эми эл катарына кошулуп Москвада кыйналып, аялы менен иштеп заңгыратып үй салды эле. Быйыл толук бүтүрүп күздө той кылам деп жаткан. Келиним эми ал үйдө кантип жашайт, балдары жаш болсо. Чоң уулу 3-класста окуйт, кичине кызы бир жашар. Кичүүсү үйгө машина келген сайын "ата" деп издеп жатат. Балдары билбейт азыр, "атаң Россияга кетти" деп койгонбуз", — деди маркумдун бир тууган эжеси Салтанат Саттарова.

Турдубай Саттаров жалгыз инисин 10 күн мурун Россияга иштеп келгени жөнөткөн. Суук кабарды угары менен ал айылына кайтып келди.

"Головной" суу таратуучу пункту Баткен районунун Кара-Бак айылынын тургундары үчүн да маанилүү. Себеби ошол жактан чыккан суу менен эгиндерин сугарышат.

Белгилей кетсек, "Головной" суу бөлүштүрүүчү жайында жалпысынан 25 жай тургун мерт болгон. Тажик тарап элге карата курал колдонуп, миномёт менен жардырган. Жаңы чыккан жагдайларда ылайык, бир чуңкурга жашынган 12 адамга миномёт снарядынын чачырандысы тийип жан берген. Ал жерге тез жардам унаасы да өтө алган эмес.

184
Белгилер:
бала, жубайлар, маркум, Баткен облусу, Кара-Бак
Тема:
Баткендеги кыргыз-тажик жаңжалы
Тема боюнча
12 адам жашынган жеринде жан берген. Кандуу окуянын очогу “Головнойдон” кадрлар
Садагам кызым, периштем... Мадинаны жоктоп кан жуткан ата-эненин күйүтү

Кежир мамалак, кежигесинен тиштеген энеси. Бассейнге келген аюунун видеосу

115
Калифорниядагы (АКШ) Аркадия шаарынын жашоочусу Эрик Лян жаратылыш паркына жакын жайгашкан үйүнө, тагыраагы, үйдүн бассейнине жапайы аюунун төрт мамалагы менен келип, "киринип" кеткенин видеого түшүрүп калган.

"National Geographic Россия" сайты жапайы конок Angeles National Forest коругунун жашоочусу экендигин жазды.

"National Geographic Россия" сайты Angeles National Forest коругуна жакын аймактагы үйлөргө жапайы жаныбарлар келип каларын, бирок адатта бул эне аюудай болуп, кожойке катары жүрбөй тургандыгын жазды.

Кадрдан алгач аюунун бассейндеги сууда жаткандыгын, ал эми кургакта төрт мамалагы жүргөнүн көрүүгө болот. Бир топ убакыттан кийин суудан чыккан жырткыч шашпай басып, балдарын ээрчитип токойду көздөй жөнөгөн.

Бул окуянын баарын үйдүн кожоюндары айнектен жасалган дубал аркылуу видеого тартып турушкан.

Аюу шашылбай басып, адамдар келип калат деп чочулабай балдарын ээрчитип кеткени менен, бирөө бассейнди айланчыктап кетпей койгон. Башка мамалактары менен кайтып келген эне аюу алгач баласын тумшугу менен түрткүлөп алып кетүүгө аракет кылган. Бирок кичинекей кежир кеткиси келбей, чачыраган сууну айланчыктап туруп алган. Ачуусу келдиби же тажадыбы энеси мамалактын кежигесинен аярлап тиштеп, бир нече кадам барган. Бир аз айланчыктаган соң энеси жолун улап, анын артынан балдары ээрчип кетип бараткан учур менен видео аяктаган.

115
Белгилер:
мамалак, аюу, парк, жаратылыш, Калифорния, АКШ
Тема боюнча
Эшигин өзү ачып-жаап, баладай секирип ойноп. Чээнден чыккан аюунун видеосу
Жарылбай калган снаряддар

Коргоо министрлиги Баткендеги жарылбай калган снаряддарды көрсөттү. Сүрөт

0
(жаңыланган 18:59 06.05.2021)
Коргоо министрлигинин сапёрлору жарылуучу каражаттарды байкап калган учурда ага тийбестен аскерлерге же бийлик өкүлдөрүнө кабарлоого чакырды.

БИШКЕК, 6-май — Sputnik. Кыргызстандын Коргоо министрлиги Баткен облусундагы жарылбай калган снаряддардын сүрөтүн жарыялады.

  • Неразорвавшиеся снаряды, найденные в Баткенской области после приграничного конфликта между Кыргызстаном и Таджикистаном
    Кыргызстандын Коргоо министрлиги Баткен облусундагы жарылбай калган снаряддардын сүрөтүн жарыялады
    © Фото / пресс-служба Министерства обороны КР
  • Неразорвавшиеся снаряды, найденные в Баткенской области после приграничного конфликта между Кыргызстаном и Таджикистаном
    2-майдан бери жеринде атайын жумушчу топ иштеп жатат. Алардын курамында КР Куралдуу күчтөрүнүн сапёрлору дагы бар
    © Фото / пресс-служба Министерства обороны КР
  • Неразорвавшиеся снаряды, найденные в Баткенской области после приграничного конфликта между Кыргызстаном и Таджикистаном
    Атайын топ Баткен жана Лейлек райондорундагы Максат, Кулунду, Кара-Бак, Кызыл-Бел, Достук, Миң-Булак, Самаркандек, Орто-Боз, Көк-Таш, Ак-Сай жана башка калктуу аймактарда иштеп жатат
    © Фото / пресс-служба Министерства обороны КР
  • Неразорвавшиеся снаряды, найденные в Баткенской области после приграничного конфликта между Кыргызстаном и Таджикистаном
    Коргоо министрлигинин сапёрлору жарандарды снаряд таап алган учурда аскерлерге же бийлик өкүлдөрүнө кабарлоого чакырды
    © Фото / пресс-служба Министерства обороны КР
1 / 4
© Фото / пресс-служба Министерства обороны КР
Кыргызстандын Коргоо министрлиги Баткен облусундагы жарылбай калган снаряддардын сүрөтүн жарыялады

2-майдан бери жеринде атайын жумушчу топ иштеп жатат. Алардын курамында КР Куралдуу күчтөрүнүн сапёрлору дагы бар.

Атайын топ Баткен жана Лейлек райондорундагы Максат, Кулунду, Кара-Бак, Кызыл-Бел, Достук, Миң-Булак, Самаркандек, Орто-Боз, Көк-Таш, Ак-Сай жана башка калктуу аймактарда иштеп жатат.

Коргоо министрлигинин сапёрлору жарандарды снаряд таап алган учурда аскерлерге же бийлик өкүлдөрүнө кабарлоого чакырды.

0
Тема:
Баткендеги кыргыз-тажик жаңжалы
Тема боюнча
Бир айыл 5 уулун жоготту. Турдубайдын чек арада окко учканын 4 баласы биле элек
Ташиев: бир дагы метр жерибизди бербейбиз, Ворухка коридор ачылбайт