Мени президент сунуштады, министрлердин теңи алмашат. Мариповдун маеги видеодо
(жаңыланган 17:47 01.02.2021)
Премьер-министрликке талапкер Улукбек Марипов бул кызматты президент Садыр Жапаров сунуштаганын билдирди. Ал мамлекеттик кызматта иштеген 20 жылдык тажрыйбасын колдонуп, алгылыктуу кадамдарга бара турганын айтууда.Марипов өкмөттүн жаңы курамын, түзүмүн жана программасын бүгүн кечке чейин Жогорку Кеңештин көпчүлүк коалициясына сунуштай турганын билдирди. Ага ылайык, азыркы министрлердин дээрлик жарымы алмашат.
Ал эми шайлоо убагында Садыр Жапаровдун штабында иштеген деген кепти четке какты. Бирок шайлоо өнөктүгү маалында эмгек өргүү алып айылында жүргөнүн жашырган жок.
Айыл чарба, тамак-аш өнөр жайы жана мелиорация министри Тилек Токтогазиевдин ордунда калары арсар болуп жатканын айтты.
"Бул маселе чечиле элек, тактап туруп айталы. Азыркы министрге менин жеке оюм жаман эмес. Бирок айыл чарба министрлиги абдан күчтөндүрүлүп жатат. Ошол жүктү тартып кете алабы же кете албайбы, ошол жагын эске алабыз", — деди Марипов.
©
Пресс-служба президента КР / Султан Досалиев
Улукбек Марипов 42 жашта, Эсеп палатасынын төрагасы кызматында 2016-жылдын март айынан бери иштеп келе жатат. Ага чейин президенттик аппараттын жетекчисинин орун басары болуп турган. Атасы Асамидин Марипов КРдин эмгек сиңирген дарыгери. Жогорку Кеңештин II жана III чакырылышынын депутаты. Учурда Ноокат аймактык ооруканасынын директору болуп эмгектенип келүүдө.
Касымалиева Конституциянын долбоорун чачы таралбаган адамга салыштырды. Видео
(жаңыланган 21:28 02.03.2021)
Бүгүн Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин регламенти боюнча комитет жаңы Баш мыйзамдын долбоорун карады. Айрым эл өкүлдөрү сын айтканы менен аягында бир добуштан колдоп беришти.Жыйында депутат, Конституциялык кеңешменин мүчөсү Бактыбек Турусбеков баяндама жасап, референдумду 11-апрелге жергиликтүү кеңештердин шайлоосу менен кошо өткөрүүнү сунуштады.
Адегенде эле депутат Мыктыбек Абдылдаев Жогорку Кеңеш жаңы Конституциянын долбоорун кабыл алабы деген суроону кабыргасынан койду. Ал парламент өзгөртүүгө укуктуу экенин белгилеп, ал эми жаңысын кабыл алуу Баш мыйзамда жазылбаганын айтты. Бул суроого комитеттин төрагасы да, Конституциялык кеңешменин мүчөлөрү дагы так жооп бере алган жок.
Ал эми Аида Касымалиева буга чейин депутаттар берген сунуштар Баш мыйзамдын долбооруна кошулбай калганын айтты.
"Конституциялык кеңешменин катчылыгынан сурасам бир да сунуш келген жок деп жатат. Анда биз айткан сунуштар кайда кетти, эмнеге кайра-кайра талкуулап жатабыз? Бүгүн комитетте каралып жатат, эми мындан ары регламентке ылайык эч жерин өзгөртө албайбыз. Биздин өзгөртүү киргизүү мүмкүнчүлүгүбүз иштебей калды. Баш мыйзам редакциялык жагынан дагы уят болбогудай болушу керек. Текст боюнча бардык мүчүлүштүктөрдү карап чыгышыбыз керек. Азыр чачын тарабаган адам сыяктуу болуп калган. Ушул бойдон кетсе баарыбыз уят болобуз", — деди Касымалиева.Белгилей кетсек, 17-февраль күнү жаңы Баш мыйзамдын долбоорун демилгечи болду делген 80 депутат жана Конституциялык кеңешменин мүчөлөрү талкуулаган. Эл өкүлдөрү бир нече кемчиликтерин таап, сунуштарын беришкен. Анда Конституциялык кеңешменин катчылыгы карап чыгып сунуштарды кошо турганы айтылган.
Бүгүн болсо көп талкуу болгон жок, төрт-беш депутат гана суроо берүү менен чектелди. Жыйынтыгында комитеттин мүчөлөрү бир добуштан колдоп беришти.
Регламентке ылайык, эми Конституциянын долбоору парламенттин жалпы жыйынында каралат. Эгер үч окуудан тең колдоо тапса, референдум дайындалмакчы.
Жапаровдун Казакстанга болгон сапарынын биринчи күнү кандай өттү. Видео
(жаңыланган 18:38 02.03.2021)
Президент Садыр Жапаров бүгүн, 2-мартта, Казакстанга мамлекеттик иш сапары менен барды. Өлкө башчысын Нур-Султандын аэропортунан бир нече министр жана калаа акими тосуп алды.Эки президент Нур-Султандагы "Акордада" жолукту. Алар алгач тар чөйрөдө сүйлөшүп, андан соң кеңейтилген форматтагы жолугушуу өттү. Анда эки жана көп тараптуу кызматташуунун актуалдуу маселелери, биргелешкен өз ара алаканын мындан аркы келечеги талкууланды.
Кийин сүйлөшүүлөрдүн жыйынтыгы боюнча президенттер бирдиктүү билдирүү жасап, бир нече документке кол коюшту.
Сокулук РИИБдин убактылуу кармоо жайында бир киши көз жумду. Ишти УКМК иликтейт
(жаңыланган 00:35 03.03.2021)
Ишти ар тараптуу жана объективдүү иликтөө үчүн текшерүү дайындалган. ИИМ, Чүй ОИИБи менен прокуратура жетекчилиги аны көзөмөлгө алган.БИШКЕК, 3-мар. — Sputnik. Сокулуктагы убактылуу кармоочу жайда бир киши каза болгонун Чүй облустук ички иштер башкармалыгынын маалымат кызматы кабарлады.
2-март таң эрте Сокулук райондук милициясынын убактылуу кармоочу жайынын күзөтчүсү камактагы 51 жаштагы эркек кишини эс-учун жоготкон абалда тапкан.
"Окуя болгон жерге дароо Тез жардам кызматы чакырылып, медиктер киши көз жумганын аныкташкан. Анын өлүмүнүн себебин аныктоо үчүн экспертиза дайындалды", — деп айтылат билдирмеде.
Каза тапкан адам Кылмыш-жаза кодексинин 200-беренеси ("Уурулук") менен шектелип, эки айга камакка алынган.
Ишти ар тараптуу жана объективдүү иликтөө үчүн текшерүү дайындалган. ИИМ, Чүй ОИИБи менен прокуратура жетекчилиги ишти көзөмөлгө алган. Аталган факт каттоого алынып, чогултулган материалдар кошумча иликтөө үчүн УКМКга өткөрүлүп берилген.