Марипов качып кеткен Шадиевдин өкүл баласы экенин мойнуна алды. Видео

Жазылуу
Премьер-министрликке талапкер Улукбек Марипов экс-депутат Аскарбек Шадиевдин өкүл баласы экенин мойнуна алды. Кечээ анын атасы Асамидин Марипов Sputnik агенттигине мындай маалыматты төгүндөгөн. Ал мурда Ноокатта "өкүл ата" деген түшүнүк жок болгонун билдирген.
Улукбек Марипов атасы айткандай эле кичи мекени Ноокат районунда мурда өкүл ата дайындоо болбогонун белгиледи. Бирок журналисттердин суроосуна жооп берип жатып, Шадиевдин өкүл баласы экенин жашыра алган жок.
"Эми андай нерсе болгон, мен аны кесе эле айтам, (өкүл атам — ред.) болгон. Бирок мен финансылык, башка маселелерде өзүмдүн ишимди так аткаргам. Аны менен акыркы ирет качан байланышканым эсимде жок. Эсеп палатасында беш жылдай иштедим. Андан мурун Ак үйдө (президенттик аппаратта — ред.) иштеп жүргөндө, балким, жолуккандырмын. Менин ушундай принциптерим бар, негизи өзүмдүн өкүл балдарымды дагы чайга чакырбайм, мага таарынып жүрүшөт", — деди Марипов.
Ошондой эле ал Шадиев Баткен облусун жетектеп турганда анын жардамчысы болуп иштегенин да тастыктады.
Эсеп палатасынын төрагасы Улукбек Марипов. Архив - Sputnik Кыргызстан, 1920, 01.02.2021
Дарыгер, экс-депутаттын уулу. Улукбек Марипов тууралуу 7 факты
Белгилей кетсек, экс-депутат Аскарбек Шадиев ушул тапта издөөдө. Кылмыш ишин козгоого ЖКнын Эл аралык иштер, коргонуу жана коопсуздук комитетинин бөлүм башчысы Арсен Закировдун 2 миллион сомду ыйгарып алуусу себеп болгон. Катка комитеттин төрагасы Шадиев кол коюп берген. Мүлкү камакка алынып, кийин депутаттык мандаттан ажыратылган.
Кылмыш иши козголордон бир күн мурда, 27-апрелде, Шадиев Исфанага (Баткен облусу) тууганынын тажиясына кетип, ал жактан суу кечип кыргыз-тажик мамлекеттик чек арасынан өтүп кеткен. 28-апрель күнү дипломаттык паспорту менен Кожент — Москва каттамы менен учуп, андан ары Нью-Йоркко чыгып кеткени айтылган.
Жаңылыктар түрмөгү
0