Аялдар Ак үйдүн дарбазасын каккылап... Бишкектеги митингдин баштан-аяк видеосу

1695
(жаңыланган 01:06 03.03.2020)
2-мартта абактагы экс-депутат Садыр Жапаровдун бошотулушун талап кылып миңден ашуун адам митингге чыкты. Алар саат 13.00дө "Ала-Тоо" аянтына чогулду. Митингге өлкөнүн ар аймагынан жаштар, аялдар жана аксакалдар келишкен.

БИШКЕК, 3-мар. — Sputnik. Алар кезектешип трибунага чыгып түрдүү талаптарын айтып жатышты. Эң негизги талабы — Садыр Жапаровду бошотуу. Болгондо да бүгүн камактан чыгарып, эл алдына алып келүү талабын коюшту.

Митингчилердин 10 өкүлү президент Сооронбай Жээнбеков менен жолугууга аракет кылып, Ак үйгө барышты. Аларды президенттик аппараттын кайрылуулар бөлүмүнүн жетекчиси Саякбай Субанов кабыл алып, талаптарын жеткирүүнү убада кылды. 

Экс-депутаттын агасы Сабыр Жапаров эл алдына чыгып президент аларды үч күндүн ичинде кабыл алышы мүмкүн экенин билдирди. Мындан улам ал "үч жыл деле күттүк, эми үч күн күтүп коёлу" деп элди тынч тарап кетүүгө чакырды. Деген менен жаалданган эл анын тилин албай, митингди уланта берди.

Саат 17.00дөн кийин 20-30 чакты аял Ак үйгө барып дарбазасын кагып, жумуштан чыгып бараткан кызматкерлерге да айбат көрсөтүштү. Алар депутаттардын жана президенттин чыгышын талап кылышты.

Бүгүнкү митингдин уюштуруучулары акцияны саат 17.00гө чейин өткөрүүгө уруксат алышкан, бирок чогулгандар өз убагында тараган жок.

Алар Ак үй тарапка бет алып Чүй проспектисин бөгөп алышты. Мындан улам күч түзүмдөрү саат 18.20 чамасында суу чачып, көздөн жаш агызуучу газ, кулак тундуруучу граната колдонуп, "Ала-Тоо" аянтынан сүрүп чыгарды. Басымдуу бөлүгү Орозбеков жана Панфилов көчөсү менен жогору көздөй чыкты. Каршылык көрсөткөндөр да болуп күч түзүмдөрүнө карата таш ыргытышты, милиция кызматкерлери болсо жооп кайтарды.

Укук коргоочулар элди Панфилов менен Лев Толстой көчөсүнө чейин сүрүп чыгарып, артка кайтышты. Бир сааттан кийин, саат 20.30дар чамасында, күч түзүмдөрү калаадагы коомдук тартипти көзөмөлүнө алды.

Саламаттыкты сактоо министрлиги башаламандыктан бир кызга желим ок тийип, жеңил жараат алганын билдирди. Ал эми укук коргоо органдарынан бирөө көкүрөк тушка, экинчиси ийининен жеңил жаракат алганы айтылды. Экөөнүн тең абалы канааттандырарлык.

ИИМдин маалымат кызматынын жетекчиси Бакыт Сеитов башаламандыкта 100дөй адам кармалганын кабарлады. Ал эми митингдин уюштуруучулары Каныбек Осмоналиев, Сабыр Жапаров (Садыр Жапаровдун агасы) жана Амангелди Артыков УКМКга алып келингенин билдиришти.

Садыр Жапаровдун камалышы

Садыр Жапаровду 2017-жылдын 25-мартында кыргыз-казак чек арасынан Бишкекке кирип келе жатканда кармашкан. Буга анын Кумтөр маселесине байланыштуу митинги себепкер болгон. Ага Кылмыш кодексинин төрт беренеси менен иш козголгон. Бишкектин Биринчи май райондук соту Жогорку Кеңештин мурдагы депутатын кишини барымтага алды деп 11 жыл 6 айга эркинен ажыраткан.

Жапаров өткөн жылдын октябрь айында президент Сооронбай Жээнбековго ырайым сурап кайрылган. Мамлекет башчы жыл жыйынтыктаган маалымат жыйынында бул маселе каралып жатканын айткан болчу.

Жапаров абакта отурган жылдары — 2017-жылы атасы Нуркожо Мустали уулу, 2019-жылы энеси Кадича Жапарова жана уулу Дастан каза болду.

1695
Белгилер:
эл, абак, талап, милиция, кармоо, Митинг, Садыр Жапаров
Тема:
Садыр Жапаровдун тарапташтарынын Бишкектеги митинги (25)
Тема боюнча
Бакиевдин тушунда бир катар кызматта иштеген. Садыр Жапаров тууралуу 11 факты
Милиция "Ала-Тоодогу" митингчилерди суу менен аткылап тарата баштады. Сүрөт, видео

Кежирлигин айт! Карганын кирпини түрткүлөп, жолдон өткөргөн видеосу

676
Кадимки эле асфальтталган жолду туурасынан кесип, басып-баспай кежеңдеп бара жаткан кирпини артынан тумшугу менен чокулап, түрткүлөп өткөрүп бара жаткан чар карганы көрүүгө болот.

Маалыматты "National Geographic Россия" сайтына жарыялады.

Экөөнүн өтүп кетишин бир нече автоунаалар күтүп, казкатар тизилип токтоп калган.

Окуя Латвиянын Огре деп аталган шаарында болгон.

Видеону көргөн киши аргасыздан жылмаят. Кирпи чечен жалкоолондубу же башка себеби барбы, айтор, карганын чыдамын кетиргенин көрүүгө болот. Анткен менен кежирликке моюн бербеген канаттуу кезеги келгенде тумшугу менен тил укпаган, кашаңданган жаныбарды чокуп-чокуп алып жатканы көзгө дароо урунат.

Видеонун алдына комментарий жазгандардын бири "карганын бул камкордугу калп эле, четке чыгарып алып жеши да мүмкүн" деген.

Ал эми дагы бир интернет колдонуучу карганын акылы жети жаштагы баладай деген пикирин айтып, канаттуу кирпини өлтүрүүгө аракет да кылбастыгын жазган.

676
Белгилер:
автоунаа, видео, канаттуулар, чечен, кирпи, чара, Латвия
Тема боюнча
Жол эрежесин көзөмөлдөгөн камерага "фотосессия" өткөргөн тоту куштун видеосу
Саякатчы кирпи Instagram баракчасында жылдыз болууда. Сүрөт

Комдонуп, кулакты жапырып. Кара кулак шердин жонунан тартылган видео

234
Америкадагы зоопарктардын биринде кара кулак шердин кантип чуркагандыгын, күүлөнгөндүгүн, дегеле кыймыл аракетин бир нече сантиметр жакындыктан көрсөтүп беришти.

Адатта бул жырткычтын жанына жолоого мүмкүн эмес экендиги баарына дайын. Бул туурасында "National Geographic Россия" сайты жазды.

Кара кулак шер мышык тукумундагы жаныбарлардын эң күлүгү. Үч секунда ичинде ылдамдыгын саатына 112 чакырымга жеткире алат, тагыраагы, тез күүлөнөт. Бир секундада өзүнүн тулку боюнан 16 эсе узун аралыкка чуркоого жөндөмдүү.

Цинциннати зоопаркынын кызматкерлери кызыккандарга сейрек видеону тартуулашты. Сейрек дегендин себеби, бир нече сантиметрден туруп, ошончолук ылдамдыкта, аны менен эч ким катарлаша чуркай албайт. Мындай мүмкүн да эмес, себеби жырткыч чоочун бирөөнү жанына жакын жолотпойт.

Зоопарк кызматкерлери кара кулак шердин бел жагына GoPro камерасын орнотуп, анын бир кадамын көрүүчүлөргө тартуулады. Аны карап турган адам жаныбардын кантип даярданып, кантип күүлөнүп, анан кантип атырыла чуркап бара жаткандыгына күбө боло алат.

234
Белгилер:
кара кулак, зоопарк, ылдамдык, видео, АКШ
Тема боюнча
Иранда иттерди COVID-19ду аныктоого үйрөтүшүүдө. Кызыктуу видео
Карантинден кийин көрүшкөн кожоюн менен эшектин эмоциясы. Видео
COVID-19 вируска каршы дары таблеткалары. Архив

Россияда коронавируска каршы вакцина кийинки жумада чыгып, акысыз берилет

0
(жаңыланган 23:52 05.06.2020)
Бул —  коронавируска каршы чыгарылган Россиядагы алгачкы, ал эми дүйнөдө экинчи болуп катталган дары экени айтылат.

БИШКЕК, 5-июн. — Sputnik. Коронавируска каршы "Авифавир" препараты Россияда Милдеттүү медициналык камсыздандыруунун алкагында бекер берилет. Бул тууралуу Россиянын түз инвестициялар фондунун башчысы Кирилл Дмитриев президент Владимир Путин менен жолукканда айтканын Кремлдин сайты маалымдады.

Дмитриев "Авифавир" коронавируска каршы чыгарылган Россиядагы алгачкы, ал эми дүйнөдө экинчи болуп катталган дары экенин билдирген.

"Ал 11-июндан тарта Россиянын клиникаларына келип түшөт. Ал россиялыктарга Милдеттүү медициналык камсыздандыруу программасы боюнча бекер берилет", — деп айткан Дмитриев.

Маалыматта мындай вакцинадан жылына 700 миң даана чыгаруу пландалганын, бирок суроо-талап көп болуп, башка 10 өлкөдөн да сурам келип жатканын белгилеген. Мындан улам санын эки миллионго чейин жеткирүү пландалган.

0
Белгилер:
Россия, дарылоо, вакцина, коронавирус
Тема:
Кытайдагы жаңы типтеги коронавирус
Тема боюнча
Россия: коронавируска каршы чыгарылган бир вакцина баарына жарай бербейт
Коронавируска каршы Япония чыгарган вакцина июлда сынактан өтөт