БИШКЕК, 12-окт. — Sputnik. Россия башчысынын маалымат катчысы Дмитрий Песков мамлекет башчысынын эл аралык маселелер боюнча жардамчысынын кызматын ээлеши мүмкүн. Бул тууралуу "Коммерсант" басылмасына шилтеме кылып РИА Новости жазып чыкты.
"Коммерсант" белгилегендей, Ушаковдун иштен кетүүсү боюнча маселе кийинки жылдын март айына чейин чечилиши керек. Гезиттин булактары президенттин жардамчысынын ишине доомат жок экенин айтышкан.
Азыр Ушаков ээлеп жаткан кызматка келчүлөрдүн аты аталып жатат. Песковдон сырткары бул ишке Россиянын Кытайдагы элчиси Андрей Денисов жана ТИМдин бир катар кызматкерлери талапкер катары чыгууда.
Дмитрий Песков маалымат катчы кызматын 2012-жылдын май айынан бери ээлеп келет. Ага чейин 4 жыл өкмөт башчынын маалымат катчысы болгон.
