БИШКЕК, 8-ноя. — Sputnik. Мексиканын Тулансинго шаарында футбол сүйүүчүлөрү тарабынан түзүлгөн командалар арасында өткөн беттеште башкы калыс футболчунун колунан ажал таап, оюн трагедия менен аяктады. Бул тууралуу британиялык The Daily Mail басылмасы жазып чыкты.
Маалыматка караганда, Рубен Ривера Васкес аттуу футболчуга орой оюн көрсөткөнү үчүн кызыл карта берилген. Мындай бурулушту күтпөгөн оюнчу калысты көздөй чуркап келип муштуму менен бир койгон. 59 жаштагы калыс ошол жерден жыгылып калган. Кийин анын дем алуусу начарлап каза болгон.
Басылманын маалыматына караганда, Васкес окуя болгон жерден качып кетип ошол бойдон табыла элек. Бул трагедия өткөн жекшемби күнү Мексиканын Тулансинго шаарында болгон.
