Эрдоган АКШ президенти Трамп менен жолукса, Гүленди берүүнү сурарын айтты

БИШКЕК, 27-янв. — Sputnik. Түркия президенти Режеп Тайип Эрдоган АКШнын жаңы шайланган перизденти Дональд Трамп менен жолугуп, түрк-америка байланыштарын талкуулоого ниеттенип жаткандыгын айткан. Бул туурасында РИА Новости Hurriyet гезитине шилтеме кылып кабарлады. 

"Мен көпкө узатпай эле Дональд Трамп менен жолуксам деп жатам. Талкуулай турган негизи темалардын негизгиси — түрк-америка мамилелери болмокчу. Биздин стратегиялык байланыштарыбыз жакшы иштеп жатабы? Жок. Аны жандандырышыбыз керек", — деп айткан Эрдоган.

Ал эки өлкө тең НАТО мүчөлөрү экендигин, бирок азыркы алакалары аталган уюмдун тилектештигине жооп бербей тургандыгын айткан.

Президенттин айтымында, эки мамлекеттин ортосундагы дагы бир маанилүү делген маселе — экономикалык жана өзгөчө коргонуу өнөр жайы тармагындагы байланыш.

Мындан сырткары, Түркия жетекчиси америкалык кесиптеши менен диний үгүтчү, учурда оппозициячыл деп саналган Фетхуллах Гүленди экстрадиция кылуу боюнча сүйлөшөрүн айткан.

Анкара учурда Гүленди 2016-жылдын июль айында болгон төңкөрүш аракетин уюштурду деп күнөөлөп келет.

"Биз бул максатыбызга (Гүленди экстрадиция кылуу – ред.) жетүүнү каалап, 85 досьенин тагдырын сурайбыз. Мындан ары да иликтөө алкагында иштерди жиберүүнү уланта беребиз", — деген Эрдоган.

Акыркы маалыматтарда Гүлендин уюмуна тиешеси бар деп жалпысынан 92 607 адамга карата иликтөө иштери жүрүп, анын ичинен 36 951 киши камалгандыгы айтылып келет.