БИШКЕК, 29-апр. — Sputnik. Түндүк Корея учурган баллистикалык KN-17 ракетасы кыска аралыкка учуп, андан кийин абада жарылып кетти. Бул туурасында РИА Новости CNN телеканалына шилтеме кылып кабарлады.
Телеканал Пентагондогу маалымат булактарына таянып, ракета абадан жарылып, андан соң деңизге кулаганын билдирди.
Рёнхап агенттигинин билдиришинче, Түндүк Кореянын учурган ракетасы абада 79 чакырым бийиктикке көтөрүлүп, бир нече мүнөт гана кармалган.
Өткөн жума күнү Нью-Йоркто Бириккен Улуттар Уюмунун коопсуздук кеңешинин жыйыны өткөн. Анда АКШнын мамлекеттик катчысы Рекс Тиллерсон дүйнөлүк коомчулукту аталган өлкөгө экономикалык кысым жасап жана Пхеньян менен дипломатиялык мамилени үзүүгө чакырган.
Ага чейин АКШнын президенти Дональд Трамп Түндүк Корея менен "ири жаңжал болушу мүмкүн" деген билдирүүсүн тараткан.
