БИШКЕК, 3-ноя. — Sputnik. "Ислам мамлекети" террордук уюму Нью-Йорктогу терактыны алар жасагандыгын айтты. Бул туурасында РИА Новости Рейтер агенттигине шилтеме кылып кабарлады.
Эске салсак, шейшемби күнү жүк ташуучу чакан автоунаа Манхэттендин көчөсүнөн велосипед тепкендерди жана жөө кишилерди сүзүп, андан сырткары, мектептин автобусун дагы коюп кеткен. Кырсыктын айынан сегиз киши каза болуп, ондон ашыгы түрдүү жаракат алган. АКШ бийлиги бул окуяны теракт деп сыпаттады. Ал эми кишилерди сүзгөн айдоочу өзбекстандык жаран Сайфулло Саипов полиция кызматкерлери тарабынан атылып, жаракат алган. Учурда ооруканада.
Ал автоунаага кол салууну "Ислам мамлекети" террордук уюмунун атынан жасап жаткандыгын айтып, кат калтырган. ФБРдин маалыматына караганда, Саиповдун телефонунан 90 видео жана 3,8 миң сүрөт табышкан. Алардын арбыны "Ислам мамлекетине" байланыштуу болгон деп жазды Рейтер. Тагыраагы, алардын ичинен согушкерлердин башкаларды өлүм жазасына тартып жатканы, террордук белгилер жана алардын лидерлеринин сүрөтү да чыккан.
Учурда ал террордук аракетке күнөөлөнүп, өлүм жазасына тартылышы айтылууда.
