Сирия президенти Башар Асад. Архив

Башар Асад: Сириядагы апаат үчүнчү дүйнөлүк согуштун мини модели болду

761
(жаңыланган 16:59 11.11.2019)
Сирия президенти туура бир жарым жылдан кийин маек курду. Өз сөзүндө ал өлкөнүн учурдагы абалы, 2021-жылы боло турган шайлоо, аль-Багдадинин өлүмү, АКШнын саясаты тууралуу кенен айтып берген.

БИШКЕК, 11-ноя. — Sputnik. Сириядагы апаат кыйыр жүргөн үчүнчү дүйнөлүк согуштун мини модели болуп калды. Бул тууралуу өлкө башчысы Башар Асад RT телеканалына курган маегинде айтты.

Президенттин айтымында, Сириядагы согуштун башталышынын бир себеби нефть да болушу мүмкүн.

"АКШ дүйнө жүзү менен согуш жүргүзүп жатканын унутпаңыздар. Экинчи дүйнөлүк согуштан кийин, өзгөчө Советтер Союзу тараган соң, түзүлүп калган тартип-эрежелер эскирип бүттү. Россия, Кытай, Индия жана ушул сыяктуу өлкөлөрдүн күнү тууп жатат", — деди ал.

Асаддын айтымында, АКШ дүйнө лидерлиги жаатында эч кимди, керек болсо Улуу Британия, Франция сыяктуу мамлекеттерди да өнөктөш катары таануудан баш тартып келет.

"АКШ өнөктөш дегенди билбейт, ошон үчүн күрөш жүргүзүп келет. Сириядагы апаат — кыйыр түрдө жүргөн үчүнчү дүйнөлүк согуштун кичинекей модели", — деди президент.

Атомдук курал

Башар Асад Сирия армиясы эч качан атомдук курал колдонбогонун, бул боюнча айтылган бардык маалыматтар, айыптоолор чындыкка дал келбей турганын билдирди.

"2013-жылы 21-августта Дамаскиге иликтөө жүргүзүү үчүн биринчи эл аралык делегация келди. Химиялык куралыбыз болуп, аны колдонууну чечсек дагы айыптоолордо айтылгандай, дал ошол күнү пайдалана алмак эмеспиз. Бул биринчиден. Экинчиден, бизге коюлган кинеде 200дөй жай тургундун каза болгону айтылат. Эгер биз эл жыш жашаган аймакта химиялык курал колдонсок, курмандыктын саны алда канча көп болмок. Үчүнчүдөн, мунун баары Батыштын расмий адамдарынын ой-кыялы гана. Алар эч кандай далил келтире алышкан жок. Бул маалыматтарды четке каккан бир топ отчеттор жазылды. Сирия армиясы эч качан өзөктүк курал колдонгон эмес. Айтылгандардын баары куру сөз, жалган жалаа", — деди Асад.

Президент иликтөө жүргүзүү үчүн Сирияга Химиялык куралга тыюу салуу боюнча уюм өкүлдөрүн чакырганын, бирок чечим көп учурда адилетсиз болуп чыкканын белгиледи.

Дал ушул уюмдун чыгарган тыяныгынын негизинде Улуу Британия, АКШ жана Франция Сирияны бомбалоо тууралуу чечим чыгарганы тууралуу жооп берип жатып Асад "чечим чыгаруу" — бул башка нерсе экенин, ал эми айтылганды далилдөө — таптакыр башка экенин кошумчалады.

Ак каскачандар

RT телеканалынын кабарчысы менен баарлашып жатып Башар Асад "Ак каскачандардан" чыккан "периштелердин" арасында "Аль-Каиданын" катарында жүргөндөр да бар экенине токтолду.

"Алардын жүздөрү кадимкидей таанылып турат. Арасында ойлонбостон адамдардын башын алганы да, өлтүрүлгөн жоокердин жүрөгүн жегендери да бар. Булардын баарын интернеттен табууга болот. Биз тарапта "Ак каскачандардын" пиар-акцияларына эч ким ишенбейт. Алар — "Ан-Нусранын" эле бир канаты. Бизде далилдер бар", — деди президент.

АКШнын саясаты тууралуу

Сириянын президенти АКШнын саясаты негизинен сынамык аракеттерден жана кетирген кемчиликтеринен турарын айтты.

"Афганистанды басып киришти — майнап чыккан жок. Иракка киришти — мында да эч нерсе болгон жок. Анан башка мамлекеттерге баскынчылык аракеттерин баштады, бирок ыкмасын өзгөрттү. АКШ эптеп аман калуу үчүн күрөш жүргүзүп жатам деп ойлоп жатат, анткени дүйнөдөгү лидерлик позициясынан тая баштады. Ошондон улам Россия, Иран, Сирия менен, айтор "жок" деп моюн толгонгон бардык тараптар менен күрөш жүргүзүүдө. Керек болсо Батыш өлкөлөрү менен да согушууга даяр. АКШга болгону күрөшүү үчүн курал гана керек. Армиясын Иракка жөнөттү, бирок мындай аракет ишке ашкан жок, көп жоготууга учурап, бул үчүн Американын өзүндө да жазалангандар болду", — деди Асад.

Президенттин айтымында, мындан улам АКШ үчүн үчүнчү тарап зарыл.

"Аль-Каида" — Сирия, Россия жана Иран өкмөттөрү менен согуша турган үчүнчү тарап. Ошон үчүн алар ушундай ыкманы колдонушат. Буга далил да жетиштүү. 2014-жылы кайдан-жайдан эле "Ислам мамлекети" пайда боло калганы эмнеден кабар берет? Американын куралы менен куралданып бир эле убакта Сирияда да, Иракта да элдин тынчын алды го. АКШ авиациясынын көзөмөлү менен Түркияга миллиондогон баррель нефтини кантип алып киришти? Америкалыктар аларды сирия армиясына каршы пайдалангысы келген. Бул биздин эмес, америкалыктардын өздөрүнүн сөзү", — деди Асад.

Аль-Багдадинин өлүмү

Президент "Ислам мамлекети" террористтик уюмунун лидери Абу Бакр аль-Багдадинин өлүмү тууралуу да пикирин айтты. Асад аль-Багдадинин америкалыктар өз түрмөсүндө кармап жатып, абактан да өздөрү бошотконун эске салды.

"Эгер аль-Багдадиге кандайдыр бир милдет, тапшырма коюлбаса, ал түрмөдөн чыгарылмак эмес. Кокусунан эле дүйнөдөгү бардык мусулмандардын өзүн-өзү жарыялаган халифи болуп жатып калды. Бул ролго ал америкалыктар тарабынан даярдалган. Биз анын жок кылынгандыгы боюнча маалыматка ишенбейбиз. Балким өлтүрүлгөнү чын чыгар, бирок айтылган себеби жалган. Мунун баарын АКШ террорчулар менен, өзгөчө "Аль-Каида", "Ислам мамлекети" жана "Ан-Нусра" менен он жылдап созулган байланышын "жокко чыгаруу" үчүн жасады. Туткундалган Саддам Хусейнди жалпыга көрсөтүшкөнүн эстейли. Аны өлтүрүп жатканда да асып жатканын көрсөтүшкөн. Балдарын өлтүргөндөн кийин алардын сөөгүн көрсөтүштү. Каддафини да ушундай эле кылышты. А эмнеге бен Ладендин, аль-Багдадинин сөөгүн көрсөтүшпөйт? Демек терроризм менен күрөшүп жатабыз дегени жөн гана фейк. Балким аль-Багдадини жөн гана кереги жок болуп калганынан же башка бирөө керек болгонунан улам жок кылып коюшкандыр",  — деди Асад.

Сирияны калыбына келтирүү

Сирияны калыбына келтирүү иштери жакын арада бүтпөйт. Ушу тапта бизге карата жарыяланган эмбарго күчүндө. Акыркы эки жылдын ичинде америкалыктар Сирияга инвестиция салчуларды киргизбөө үчүн болгон аракетин жумшады. Өлкө президенти Башар Асад өз маегинде мамлекетти калыбына келтирүү иштери тууралуу да айтты.

"Азыр инвесторлор Сирияга акча салуудан кооптонуп турушат. Бирок бул анча олуттуу маселе эмес. Өлкөнү калыбына келтирүү үчүн адам ресурсу жетишерлик, кошумча күчтүн кереги жок. Бул иштерди акырындап, этап-этабы менен жасаса болот, мындан улам мен бул эмбаргодон коркпос элем. Ал эми Россия, Кытай жана Иран сыяктуу тилектеш мамлекеттер калыбына келтирүү процессинин активдүү катышуучулары болот", — деди президент.

Шайлоо-2021

Президенттин айтымында, Сирияда 2021-жылы жалпы шайлоо сөзсүз түрдө өтөт. Асад өткөн шайлоодо үч талапкер ат салышканын эске салып, бу жолкусунда каалаган кишинин баары күчүн сынап көрсө болорун белгиледи.

Маекти толугу менен бул жактан окусаңыз болот.

761
Белгилер:
Сирия, Башар Асад, Россия, Иран, Кытай, АКШ, терроризм, инвестициялар, шайлоо
Тема боюнча
Башар Асад: Трамп — АКШ президенттеринин эң мыктысы
Путин менен Эрдогандын 6 сааттык сүйлөшүүсү аяктады. Тагдыр чечкен кадамдар
АКШлык балбан Аделина Грей. Архив

Дүйнөлүк рейтингде 1-орунда турат! Айперинин атаандашы тууралуу эмне белгилүү

102
(жаңыланган 14:36 01.08.2021)
Кыргызстандык спортчу кыз Олимпиаданын жарым финалына чыкты. Алдыда аны өтө олуттуу атаандаш күтүп турат.

БИШКЕК, 1-авг. — Sputnik. Кыргызстандык балбан Айпери Медет кызы Олимпиада оюндарынын жарым финалында АКШлык Аделина Грей менен беттешет.

Америкалык спортчу дүйнөнүн беш жолку жана Панамерикалык мелдештердин бир нече жолку чемпиону. Денверде туулуп-өскөн, учурда 30 жашта.

Бириккен күрөш дүйнөсү (United World Wrestling) уюмунун кыз-келиндер күрөшү боюнча рейтингинде 76 килограмм салмак чени боюнча биринчи орунда турат. Медет кызы бул тизмеде азырынча сегизинчи баскычта.

Экинчи жарым финалда япониялык Хироэ Минагава Сузуки (UWW рейтингинде үчүнчү орунда) менен германиялык Aлин Роттер-Фоккен (экинчи орунда) чыгат. Белгилей кетсек, 2019-жылкы дүйнө чемпионатында Грей дал ушул япониялык спортчу менен беттешкен.

Олимпиада оюндарынын 1/8 финалында АКШлык Грей Тунистен келген атаандашын 8:0, андан соң түркиялык Ясемин Адарды 6:4 эсебинде уткан.

102
Белгилер:
АКШ, Айпери Медет кызы, беттешүү, Олимпиадалык оюндар, Аделина Грей
Тема:
2021-жылы Токиодо өтө турган Олимпиада оюндары
Тема боюнча
Бали! Айпери Медет кызы олимпиада чемпионун утуп, жарым финалга чыкты
Эсеп 8:1. Айпери Медет кызы Олимпиада оюндарындагы алгачкы беттешин жеңди
Стаканга суу алып жаткан адам. Архив

Диетолог суу тууралуу мифтерди жокко чыгарды

45
Дарыгер суу тууралуу азыр айтылып жүргөн айрым нерселерди жокко чыгарып, анын себептерин түшүндүрдү.

БИШКЕК, 1-авг. — Sputnik. Учурда суу жана анын адамдын организмине тийгизген таасири тууралуу айтылып жаткан нерселердин көпчүлүгү жөн гана миф. Бул тууралуу "Прайм" агенттигиндеги маегинде эндокринолог, диетолог Ульяна Румянцева айткан.

"Мисалы, бир күндө 2 литр суунун өзүн ичиш керек деп айтылып жүрөт. Бул туура эмес, ар кайсы организм уникалдуу, баарына 2 литр суу керек деген түшүнүк жок. Экинчиден, сөз болуп жаткан көлөм бир гана суудан турушу керектигин дагы эч ким далилдеген эмес. Ага чай, кофе, шире, шорпо кошула берет. Болгону алкоголь ичимдиги менен газдалган суусундуктарды эсептебеш керек", — деди дарыгер.

Адис логикалык жактан ойлонуп көргөндө деле элдин баарына 2 литрден суу ичүү системасы туура келбесин белгилейт. Таргыраак айтканда, эркектин организми аялдыкына караганда сууну көбүрөөк  талап кылат.

Ал эми толук адамдар учурдагы салмагына эмес, жашына жана боюна жараша идеалдуу деп эсептелген салмакка ченеп ичиши керек.

"Адам ооруп турган учурда, инфекция жуктуруп, дене табы көтөрүлгөндө болушунча көбүрөөк суу ичкени жакшы. Башка ооруларга чалдыккан учурларда ашыкча суу терс таасирин тийгизип коюшу мүмкүн", — деди диетолог.

Сөзүнүн аягында адис бардыгы индивидуалдуу экенин кошумчалады.

45
Белгилер:
суу, дарыгер, миф, ден соолук, адам, норма
Тема боюнча
Канадада жасалма уруктандыруу үчүн өз уругун пайдаланып жүргөн дарыгер кармалды
Ооруканадагы бейтап. Архив

Бир суткада коронавирус 10 адамдын өмүрүн алды

0
(жаңыланган 14:45 01.08.2021)
Азыркы тапта коронавирус аныкталган 3 759 киши ооруканаларда дарыланууда. Алардын ичинен 1 100 бейтаптын абалы оор болсо, 222синин абалы өтө оор деп бааланды.

БИШКЕК, 1-авг. — Sputnik. Өткөн суткада өлкө боюнча коронавирустан 10 бейтап көз жумду. Бул тууралуу Саламаттык сактоо жана социалдык өнүктүрүү министрлигинин маалымат кызматы кабарлады.

Каза болгондор:

  • Бишкек шаары — 5;
  • Ысык-Көл — 3;
  • Нарын — 1;
  • Жалал-Абад — 1.

Ушуну менен Кыргызстанда жалпысынан 2 335 адам дарттын курмандыгы болду.

Азыркы тапта коронавирус аныкталган 3 759 киши ооруканаларда дарыланууда. Алардын ичинен 1 100 кишинин абалы оор болсо, 222 бейтаптын абалы өтө оор деп бааланды. Бүгүнкү күндө 10 369 адам үй шартында дарыланып жатканы кошумчаланды.

0
Белгилер:
Кыргызстан, коронавирус, оору, дарт, өлүм, статистика
Тема:
Коронавируска байланыштуу Кыргызстандагы кырдаал
Тема боюнча
COVID жуктургандарга Бишкек жана Чүйдүн ооруканаларындагы бош орундар
Кыргызстанда бир суткада 17 миңден ашык адам вакцина алды