22 жаштагы "Белоруссия сулуусу" депутат болду. Ал тууралуу эмне белгилүү?

БИШКЕК, 20-ноя. — Sputnik. "Белоруссия сулуусу — 2018" сынагынын жеңүүчүсү Мария Василевич VII чакырылыштагы Улуттук жыйындын эл өкүлдөр палатасынын депутаты болуп шайланды. Бул тууралуу Sputnik Белоруссия агенттиги жазды.

Модель кыз Минсктин Фрунзе районуна караштуу №104 Кальвария округунан талапкерлигин койгон. Соңку маалыматтар боюнча, Василевичке 11 583 адам добуш берген, бул жалпы шайлоочулардын 28,94 пайызын түзөт. Аны менен кошо активист Максим Винярский жана райондук "Ремавтодордун" директору Геннадий Насиевич ат салышкан.

Василевич Белоруссия парламентинин төмөнкү палатасынын эң жаш депутаты болуп калды. Ал учурда 22 жашта, депутат катары жаштар маселесине байланыштуу иштер менен алектенери белгиленет.

Мария Василевич 2018-жылы "Белоруссия сулуусу" улуттук сынагынын баш байгесин утуп алган. Андан кийин мамлекет башчысы Александр Лукашенко менен чогуу жүргөнүн көп кездештиришкен. Президент модель менен чогуу отун жарып, Европа оюндарынын алкагындагы мелдештерге барып жүргөн учурлар болгон. Мындан сырткары, жолугушуулардын биринде Лукашенко ага колхозду жетектөөнү сунуштаган.