Улуу Британия менен Канада премьерлери: Иранда кулаган учак атылган болушу мүмкүн

187
Эки өлкөнүн өкмөт башчылары лайнер кокусунан ракета менен атылган деген пикирди айтышты. Иран бул билдирүүлөргө жооп берди. Ага чейин кырсыкты изилдөөдөгү алгачкы жыйынтыкты жарыялаган.

БИШКЕК, 10-янв. — Sputnik. Улуу Британия менен Канада премьерлери — Борис Жонсон жана Жастин Трюдо кулаган украиналык учакты зениттик ракеталар атып түшүрүшү мүмкүн деген билдирүү жасады. Бул туурасында РИА Новости жазды.

Жонсон бул кокустуктан болуп кетиши мүмкүндүгүн айтып, аймактагы чыңалууну тезирээк жумшартып жана кырсыкты кенен, ар тараптан изилдөө керек деген пикирин билдирди.

"Учурда лайнер ирандык "жер-аба" ракетасы менен атып түшүрүлгөндүгү боюнча маалыматтар абдан көп болууда. Бул кокустан болушу мүмкүн. Биз Канада жана эл аралык өнөктөштөр менен тыгыз кызматташуудабыз, ачык жана кеңири иликтөө жүргүзүү зарыл", — деп айтылган Жонсондун ЖМКларга таратылган билдирүүсүндө.

Канада премьери Трюдо анын өлкөсүнүн чалгын кызматында "Украинанын эл аралык авиалиниясы" компаниясынын Boeing учагы Тегеранда ирандык ракетанын чабуулуна туш болгон деген маалымат бар экендигин айткан.

Буга чейин ВВС Вашингтон Оттавага Boeing 737-800 Ирандын зениттик-ракеталык комплексинин атканынан улам кулаган деген маалыматты өткөрүп бергендигин кабарлаган.

Мындай билдирүүлөргө Иран ТИМинин жетекчиси Аббас Мусави пикирин айтып, Канада менен Улуу Британиядан аба кырсыгы боюнча маалыматтар менен бөлүшүүнү суранган. Ал эми Ирандын Жарандык авиация уюмунун башчысы Али Абедзаде украиналык учакты ракета атып түшүрдү деген маалыматты четке каккан.

Тегеранда кулаган учак

2020-жылдын 8-январында эртең менен Тегерандын аэропортунан Киев шаарына багыт алып абага көтөрүлгөн Украинанын Boeing 737-800 лайнери бир аз убакыттан кийин эле кулаган.

Ичиндеги 167 жүргүнчү менен экипаждын 9 мүчөсүнүн эч кимиси аман калган эмес.

Ирандын Өзгөчө кырдаалдар министрлиги сөөктү таанууга да мүмкүн болбой жатканын билдирген. Бортто Иран, Украина, Канада, Германия, Швеция жана Афганистандын жарандары болгону кабарланган.

Учактын кулашына эмне себеп болгону айтылган алгачкы жыйынтык чыккандыгын Ирандын жарандык авиациясынан билдиришкен. Лайнер абада эле өрттөнүп баштаган.

187
Белгилер:
ракета, учак, Тегеран, Украина, Иран
Тема:
Иранда кулаган Украинанын учагы (21)
Тема боюнча
Улуу Британия менен Канада премьерлери: Иранда кулаган учак атылган болушу мүмкүн
Иран АКШны Украина учагынын кыйрашы боюнча иликтөөгө катышууга чакырды