Иран президенти Роухани: украиналык учакты атып алганыбызга өкүнүп турабыз

БИШКЕК, 11-янв. – Sputnik. Иран президенти Хасан Роухани жекшемби күнү ал жетектеген мамлекеттин куралдуу күчтөрү АКШнын чабуулун күтүп жатып, кокустан украиналык жүргүнчү лайнерин атып алгандыгына өкүнүп тургандыгын айтты. Бул тууралуу РИА Новости жазды. 

"Америкалык агрессиялык коркутуулардын шартында, Касем Сулейманинин өлүмүнөн кийин Ирандын куралдуу күчтөрү жүз пайыздык согуштук даярдыкта турган. Бул АКШ тарабынан болуучу чабуулдан коргонуу үчүн жасалган", — деп айтылат Роуханинин билдирүүсүндө.

Ал кайгылуу окуяда каза тапкандардын үй-бүлөсүнө көңүл айткан.

"Тилекке каршы, жаңылыштык менен кнопканы басып алганга өкүнүп турабыз. Ирандын президенти катары кайгылуу окуяда каза тапкандардын үй-бүлөсүнө көңүл айтам", — деген Роухани.

Ал кечирилгис катаны кетирген күнөөлүүлөр жоопкерчиликке тартыларын билдирген.

Эске салсак, бүгүн Иран Украина учагын кокусунан атып түшүрүп алганын мойнуна алган.

Тегеранда кулаган учак

2020-жылдын 8-январында эртең менен Тегерандын аэропортунан Киев шаарына багыт алып абага көтөрүлгөн Украинанын Boeing 737-800 лайнери бир аз убакыттан кийин эле кулаган.

Ичиндеги 167 жүргүнчү менен экипаждын 9 мүчөсүнүн эч кимиси аман калган эмес.

Ирандын Өзгөчө кырдаалдар министрлиги сөөктү таанууга да мүмкүн болбой жатканын билдирген. Бортто Иран, Украина, Канада, Германия, Швеция жана Афганистандын жарандары болгону кабарланган.

Учактын кулашына эмне себеп болгону айтылган алгачкы жыйынтык чыккандыгын Ирандын жарандык авиациясынан билдиришкен. Лайнер абада эле өрттөнүп баштаган.

Кырсыктан эки күндөн кийин Улуу Британия менен Канада премьерлери — Борис Жонсон жана Жастин Трюдо кулаган украиналык учакты зениттик ракеталар атып түшүрүшү мүмкүн деген билдирүү жасаган.