Италиялык журналист Жульетто Кьеза. Архив

Эрнест Хэмингуэйдин аналогу. Журналист Жульетто Кьезаны эскерүү

123
(жаңыланган 19:47 27.04.2020)
79 жаштагы журналист жана жазуучу Жульетто Кьезанын өлүмү россиялык коомчулук үчүн "селт" эттирген нерсе болду.

"Россиялык окурман Жульетто Кьеза ким экенин өлгөндөн кийин гана билди. Өткөн кылымдын 80-жылдарында Кьеза Александр Зиновьев менен катуу достошкон. Бул достук мамиле бекемделип, эки адамды Россия жана Европа цивилизациясынын тагдырына тынчсыздануу бириктирип турган". Журналист жана философ Владимир Лепезиндин айткандарына таянып жазган колумнист Ольга Зиновьеванын макаласы РИА Новости агенттигине жарыяланды.

Кьеза Россияга байма-бай каттап, телевидениеден сүйлөп, өлкөдөгү жана жалпы дүйнөдөгү кырдаалды ушунчалык таасын сүрөттөп бергендиктен, Россия саясаты менен журналистикасынын ажыратып алгыс бөлүгүнө айланган эле. Мен үчүн Жульетто Кьеза — Эрнест Хэмингуэйдин журналистикадагы аналогу. Албетте, бул жерде кеп дүйнөгө белгилүүлүгү тууралуу эмес, керек болсо чыгармачылыгын да айтканым жок. Аналогияны мен эки кишинин дүйнөнү кабыл алуусунан жана турмуштук позициясынан көрүп жатам.

Хэмингуэй өмүр бою улуу согуштардын активдүү катышуучусу болду. Биринчи жана Экинчи дүйнөлүк согуштарда, Испаниядагы фашисттерге каршы согушта жүрдү. Дайыма улутчулдукка каршы туруп, өз чыгармаларында, ыктыярчылык ишмердигинде адамдык бийик сапаттарды даңазалап келген. Кьеза да ушундай эле, жаштайынан коммунист да болуп, Советтер Союзу менен Россияны жакшы түшүнчү. Өмүрүнүн акырына чейин ушул калыбынан жазган жок.

Жульетто Кьезанын позициясы журналистикада болобу, саясаттабы же аналитикада болобу, эч убакта конъюнктуралык эмес эле. Тескерисинче, агымга каршы сүзүп, Европада күчөп жаткан антикоммунизм менен русофобияга каршы чыкты. Башкача айтканда, өз чындыгынан танган жок. Кьезанын Александр Зиновьев менен бирге биринчилерден болуп факт менен 2001-жылдын 11-сентябрында Нью-Йоркто болгон трагедиянын расмий түшүндүрмөсүн, чечмеленишин төгүндөп чыкканы бекеринен эмес.

Жульетто Кьезанын антиглобалдык түшүнүгү акыркы жылдары абдан курчуп кеткен эле. Батыштын атайын кызматтары тарабынан колдоого алынган Киевдеги 2014-жылкы төңкөрүштөн кийин "демократиялык" Европа Россияга тиш кайрап экономикалык санкция жарыялай баштаганда Кьеза Москваны колдоп чыккан сейрек еврожурналисттердин бири болду. Өмүрүнүн акыркы жылдарында Кьеза европалык окурманга жана көрөрманга сабырдуулук менен глобалдык капитализмдин кылмыштуу мүнөзүн түшүндүрүүгө аракет кылды.

Ошол эле маалда италиялык журналистти Кремлге же россиялык элитага ыктап турат деп да айта алчу эмессиң. Тескерисинче, Кьеза россиялык чиновниктерди, олигархтарды сындап, аларды бийликтин трансулуттук аппаратынын бир бөлүгү деп эсептечү. Ал маданиятты, сапаттуу билим берүүнү жана реалдуу демократияны колдогондордун тарабында эле. Дүйнөлүк журналистикада Кьезадай болуп улам күчөп жаткан цензурага, көмүскөдөгү кылмыштуу кландардын ааламга жаңы, санарип тартип-ыраатты таңуулаган аракетине каршы турган жазмакер болбосо керек. Дал ушул максат менен ал эл аралык "МегаЧип" антиглобалдык ассоциацияны жетектеген.

2016-жылы Жульетто Кьеза "Россия сегодня" эл аралык агенттигинин "Зиновьев клубунун" мүчөсү болууга макулдугун берген. Клубдун максаты "Россиянын акыйкат образын түзүү" эле. Мындай тилек интернационал журналисттин көз карашына дал келген.

Ооба, биз бүгүн бул инсандын баа-баркын, масштабын чындап билип, сезип, түшүнүп жатабыз. Италиялык досубуз Жульетто Кьезанын орду жоктоло баштайт.

123
Белгилер:
цензура, Россия, Италия, Европа, саясат, журналистика, Дүйнө
Тема боюнча
Россиялык эксперт журналисттерге көздөгөнүнө жеткире турган 5 кеңеш айтты
Улуу акын Александр Сергеевич Пушкиндин эстелиги. Архивдик сүрөт

Дүйнөнүн атактуулары Пушкиндин чыгармаларын түз эфирде окушат

20
(жаңыланган 13:15 06.06.2020)
Иш-чара улуу акын Александр Сергеевич Пушкиндин 221 жылдыгына жана Орус тили күнүнө арналат. Онлайн-трансляцияны "Россотрудничество" мекемеси Facebook баракчасында Бишкек убактысы менен саат 17:00дө баштайт.

БИШКЕК, 6-июн. — Sputnik. Бүгүн "Почитаем Пушкина" адабий-музыкалык марафону түз эфирде өткөрүлмөкчү. Бул тууралуу "Россотрудничество" мекемеси маалымдайт.

Иш-чара улуу акын Александр Сергеевич Пушкиндин 221 жылдыгына жана Орус тили күнүнө арналат. Онлайн-трансляцияны "Россотрудничество" мекемеси Facebook баракчасында Бишкек убактысы менен саат 17:00дө баштайт.

Түз эфирде белгилүү адамдар Пушкиндин ыр саптарын окуп, анын сөзүнө жазылган романстар аткарылат.

Иш-чараны "Россотрудничество" мекемесинин башчысы Элеонора Митрофанова ачып берип, акын жана драматург Жулиан Генри Лоуэнфельд алып барат.

Ага Россия, Бельгия, Улуу Британия, Индия, Ирландия, Кытай, Сербия, АКШ жана Франциядан ырчы, музыкант, акындар катышат.

Пушкиндин чыгармалары бир гана орус эмес, башка тилдерде дагы жаңырат.

20
Белгилер:
түз эфир, чыгарма, ыр, Александр Пушкин
Тема боюнча
Айтматов Пушкин, Толстойдон эмне үйрөнгөн? Орус адабиятынын таасири тууралуу 5 факты
Эмне үчүн Пушкин менен Шаляпиндин тилин үйрөнүү керек?
Алкоголдук ичимдик ичип жаткан адамдар. Арихв

Жай мезгили жаман адаттардан арылууга ыңгайлуу учур. ДССУнун сунушу

55
Туздуу, майлуу жана канты көп тамактардан баш тартууга жай мезгилинде жаңы бышып, ар бир дүкөндө сатылган жер-жемиштер жардам берет.

БИШКЕК, 6-июн. — Sputnik. Жай мезгили жаман адаттардан арылууга эң ыңгайлуу учур. Бул тууралуу Дүйнөлүк саламаттыкты сактоо уюмунун (ДССУ) Россиядагы өкүлү Мелита Вуйновичке таянып "Известия" басылмасы жазды.

"Азыркыдай жугуштуу илдет ар тараптан курчап турган кезде адам иммунитетин жакшыртышы керек. Ал үчүн ичимдик, чылым, туура эмес тамактануу, аз уктоо сыяктуу жаман адаттардан арылуу зарыл. Бул нерселердин баарын таштап коюуга күн жылуу, айлана жашыл болуп турган жай мезгили өтө ыңгайлуу", — деди Вуйнович.

Мисал катары ал туздуу, майлуу жана канты көп тамактардан баш тартууга жай мезгилинде жаңы бышып, ар бир дүкөндө сатылган жер-жемиштер жардам берерин айтат.

Ошондой эле жылуу мезгилдеги активдүү жашоо образы адамдын саламаттыгын бир топ жакшыртары кошумчаланды.

55
Белгилер:
чылым, ичимдик, ден соолук, жай, Дүйнөлүк саламаттыкты сактоо уюму
Тема боюнча
Сак болгула! Кан басымы жогоруларга COVID-19 өзгөчө кооптуу
Бала бакчадагы балдар. Архивдик сүрөт

Балдар таза абада көп болушу керек. Бишкектеги бала бакчалар үчүн эрежелер

0
(жаңыланган 15:40 06.06.2020)
Эпидемияга каршы ыкчам комиссия документтерди иштеп чыгып, ал Саламаттык сактоо жана Билим берүү жана илим министрликтери менен макулдашылды.

БИШКЕК, 6-июн. — Sputnik. Бишкек мэриясы балдардын бакчада жүрүүсү боюнча жаңы эреже иштеп чыкты.

Эске салсак, Кыргызстанда мектепке чейинки билим берүү мекемелерине 5-июндан тарта иштей баштоого уруксат берилген. Бирок Бирок мамлекеттик жана менчик бала бакчалардын тарбиячылары толугу менен COVID-19 вирусуна анализ тапшырышы шарт эле.

Мэриядан билдиришкендей, эпидемияга каршы ыкчам комиссия документтерди иштеп чыгып, ал Саламаттык сактоо жана Билим берүү жана илим министрликтери менен макулдашылды.

Эрежелер:

  • эртең менен бала кирип келе жатканда дене табы текшерилип, дарыгер кароодон өткөрөт;
  • кызматкерлер менен ата-энеден балада вирустун белгилери бар-жогу тууралуу маалымат алынат, анкета толтурулат;
  • имараттын ичинде бет кап кийүү керек;
  • бала бакча кызматкерлери маал-маалы менен бөлмөлөрдү тазалап, дезинфекциялап турууга милдеттүү;
  • бала бакчанын жетекчилиги иш тартибин өзгөртүүсү керек. Мисалы тайпалар болушунча бири-биринен алыс болуп, байланышпашы зарыл;
  • аба ырайы мүмкүндүк берсе, балдарды болушунча сыртта, таза абада кармоого аракет кылынышы керек;
  • балдар топтошуп ойнобой, бири-биринен 1,5-2 метр аралыкта болушу керек;
  • бөлмөлөр балдар жок кезде желдетилип турушу зарыл. Күнүнө 4-5 ирет 15 мүнөттөн;
  • бала бакчалар үч режимде иштей алат: толук күн, кыска күн жана тайпалар смен менен;
  • канча тайпа иштээри бала бакча жайгашкан аймактагы эпидемиологиялык абалга байланыштуу.

Ошондой эле мэрия тарбиячы жана ата-энелер үчүн кеңештерди даярдады. Алар менен минуципалитеттин Telegram-каналынан тааныша аласыз.

0
Белгилер:
Бишкек мэриясы, эреже, бала бакча, Бишкек
Тема боюнча
Мэрия: бала бакча кызматкерлеринин көбү анализ тапшырды
Ош шаарында 100 орундуу бала бакчанын курулушу башталды
Бала бакча кызматкерлери COVID вирусуна анализ тапшырат