Россиялык мушкер Хабиб Нурмагомедовдун атасы жана машыктыруучусу Абдулманап Нурмагомедов. Архив

Хабибдин атасы комада. Конор менен Дана Уайт анын тез сакайып кетишин каалады

512
(жаңыланган 10:23 14.05.2020)
Буга чейин ЖМКлар Абдулманап Нурмагомедов коронавирусту жугузуп алды деп шектелип жаткандыгын жазып чыгышкан. Кийинчерээк ал вируска тест тапшырганын билдирип, бирок жыйынтыгы тууралуу айтылган эмес.

БИШКЕК, 14-май — Sputnik. Россиялык мушкер Хабиб Нурмагомедовдун атасы жана машыктыруучусу Абдулманап Нурмагомедов оор абалда ооруканада жатат. Бул туурасында Р-Спорт агенттигине Хабибдин эң жакын досу Ислам Махачев билдирген.

Махачев Хабиб менен сүйлөшкөндө ал атасынын абалы оор экендигин айткан. Учурда Москвадагы клиникада дарыланып жатканын кошумчалаган.

Р-Спорт агенттигинин маалыматы боюнча, буга чейин ЖМКлар Абдулманап Нурмагомедов коронавирус жугузуп алды деп шектелип жаткандыгын жазып чыгышкан. Кийинчерээк Нурмагомедовдун улуусу вируска тест тапшырганын билдирип, бирок анын жыйынтыгы тууралуу айтылган эмес. 5-майда ооруканага жаткырылган.

Ал арада Абсолюттук мушкерлер уюмунун башчысы (UFC) Дана Уайт Instagram баракчасы аркылуу Абдулманап Нурмагомедовго батыраак сакайып кетишин каалаган.

"Абдулманап Нурмагомедов чыныгы машыктыруучулук сапатка, урмат-сыйга ээ киши. Ал ушундай баалуулуктарды өзүнүн баласына, дүйнө чемпиону Хабибге кичинекей кезинен баштап үйрөткөн жана карьерасынын түптөлүшүнө салымы чоң. Мен Хабибдин атасына канчалык жакын экендигин билем. Анын азыркы абалы жөнүндө угуп абдан капа болуп турам", — деген Уайт Instagram аккаунтунда.

Ошондой эле ирландиялык белгилүү мушкер, Хабибдин эзелки атаандашы Конор Макгрегор дагы Twitter баракчасына Нурмагомедовго колдоо сөздөрүн жазган.

​"Абдулманап Нурмагомедовдун айыгып кетишин тилейм. Ал көптөгөн мушкерлерди таптап чыгарып, элге таанытканын билебиз. Аралаш мушташ өнөрүнүн чыныгы генийи. Ооруганын угуп жаман болдум. Мен Нурмагомедовдун үй-бүлөсү үчүн тилек кылып жатам", — деген Макгрегор.

Мындан тышкары, социалдык тармактар аркылуу бир катар спортчулар Нурмагомедовдун улуусунун сакайып кетишин каалап, билдирүүлөрдү калтырып жатат.

512
Белгилер:
ден соолук, оорукана, оору, Абдулманап Нурмагомедов, Россия
Тема боюнча
UFC көзүрү Нурмагомедов менен Гэтжинин беттешчү жери менен убактысы айтылды
Нью-Йорк шаарынын Таймс-сквериндеги көчө шыпыргыч

Америкада депрессияга түшүп, тынчсыздангандар кескин көбөйдү

3
(жаңыланган 10:28 28.05.2020)
АКШнын Эл каттоо кызматы пандемиянын ар кайсы тармакка тийгизген таасирин баалоо үчүн жума сайын сурамжылоо жүргүзө баштады.

БИШКЕК, 28-май — Sputnik. Америкада пандемия башталгандан бери депрессия менен тынчсызданууга кабылгандар кескин көбөйдү. Бул тууралуу Washington Post АКШнын Эл каттоо кызматынын изилдөөсүнө таянып жазды.

Бюро апрелдин аягында жумушка орношуу, финансы, билим берүү жана саламаттык сактоо чөйрөсүнө пандемиянын тийгизген таасирин баалоо үчүн жума сайын сурамжылоо жүргүзө баштаган. Акыркы сурамжылоо 7-майдан 12-майга чейин жүргүзүлүп, ага 42 миң респондент катышкан. Анда адамдардын психикалык абалын билүү үчүн төрт суроо берилген.

Басылманын маалыматы боюнча, иликтөөгө катышкандардын 24 пайызында олуттуу депрессиянын белгилери аныкталса, 30 пайызында тынчсыздануу байкалган. Мындай симптомдор көбүнчө жаштарда кездешкени айтылат. Ошондой эле эркектерге караганда аялдарда тынчсыздануу менен депрессия көп катталган.

Адистер пандемияга чейин бул көрсөткүч кыйла ылдый болгонун белгилешет. Маселен, 2014-жылы сурамжылоого катышкандардын 25 пайызы маанайы чөгүп жүргөнүн айткан. 2020-жылы бул статистика 50 пайызга өскөн. Анын 10 пайызы күн сайын маанайы жок экендигин билдиришкен.

АКШнын калкты каттоо бюросу үч ай ичинде жума сайын сурамжылоо өткөрүүнү ниеттенип жатат.

Америка COVID-19 инфекциясы аныкталган учурлардын саны боюнча дүйнөдө биринчи орунда турат. Ал жакта ооругандардын саны 1 миллион 600 миңден ашып, жүз миңден көп киши көз жумду.

3
Белгилер:
депрессия, пандемия, коронавирус, АКШ
Тема:
Кытайдагы жаңы типтеги коронавирус
Тема боюнча
Коронавируска каршы Япония чыгарган вакцина июлда сынактан өтөт
Япония Кыргызстан баш болгон 11 өлкөнүн жарандарына кирүүгө тыюу салды
Москва шаарынын мэри Сергей Собянин журналисттердин суроолоруна жооп берип жатат. 25 май 2020 жылы

Москва мэри 1-июндан тарта кандай жеңилдиктер болорун айтып берди

15
(жаңыланган 10:22 28.05.2020)
Сергей Собяниндин айтымында, шаардыктар эшиктин алдына, сейил бактарга чыгууга мүмкүндүк алышы керек.

БИШКЕК, 28-май — Sputnik. Москва шаарында COVID-19га байланыштуу киргизилген чектөөлөр 1-июндан тарта акырындык менен жоюла баштайт. Бул тууралуу шаар мэри Сергей Собянин Владимир Путин менен видеоконференция аркылуу сүйлөшүп жатып айтканын РИА Новости жазды.

Собяниндин айтымында, мындай чечим бийлик үчүн оңойго турган жок, бирок шаардыктар эшиктин алдына, сейил бактарга чыгууга мүмкүндүк алышы керек.

"Азыр биз график иштеп чыгып, аны тесттик режимде иштетип көрөбүз. Негизи жарандар бардыгы бир учурда чыкпай, кезек-кезеги менен чыгуусу шарт", — деди Собянин.

Ошондой эле ал кийим-кечек саткан дүкөндөр, химиялык тазалоо, тиричилик техникаларды оңдоочу жайлардын ачылышы пландалып жатканын кошумчалады. Мындан тышкары, Москва мэри шаар Жеңиш парадын өткөрүүгө даяр экенин билдирди.

Ал эми Владимир Путин өлкөдө коронавирус боюнча абал турукташып калганын айтып, учурда күн сайын жуктуруп алгандарга караганда, сакайып чыгып жаткандардын саны көп экенин айтты.

Жалпысынан Путин айрым майда-чүйдө кемчиликтерди эске албаганда, Москва жетекчилигинин COVID-19 менен күрөшүүдөгү аракетин жакшы деп баалады.

15
Белгилер:
коронавирус, карантин, Сергей Собянин, Владимир Путин, Москва, Россия
Тема:
Кытайдагы жаңы типтеги коронавирус
Тема боюнча
Путин жыйында калемин столго ыргытып жиберип, министрлерден отчёт сурады. Видео
Россия кыргыз-тажик чек ара көйгөйүндө ортомчу болууга даяр