Отуруп иштөөнүн зыянын азайтуунун бир нече ыкмасы айтылды
(жаңыланган 01:13 17.08.2020)
Мындагы негизги көйгөй - буттарга кандын жакшы жетпей калышы. Акыры бул көп каражат жумшала турган дарылоону талап кылышы мүмкүн.БИШКЕК, 16-авг. — Sputnik. Адамдын физиологиясы үчүн бир нече саат бою отуруп иштөө өтө зыян. Анын ден соолукка тийгизген кесепетин азайтуу үчүн жарым саатта бир жеңил-желпи көнүгүүлөрдү жасап туруу керек. Бул тууралуу кардиолог Владимир Хорошев Sputnik радиосуна курган маегинде айтып, бир нече вариантты сунуштаган.
Дарыгердин айтымында, бүгүнкү күндө иштегендердин басымдуу бөлүгү бир күн бою отурган калыбында эмгектенүүгө аргасыз. Бул катмарга кеңсе кызматкерлери, айдоочулар кирет.
Үйдө отуруп иштөөнүн күнгөйү менен тескейи айтылды
"Отуруп иштөө адамдын ден соолугу үчүн зыян. Киши туруп турганда же жатканда кан тамырлары түз болуп турат. Отурары менен формасы кууш тартып, бутка келген кандын көлөмү кескин азаят. Бул өтө жаман нерсе. Кандын жайлашы артериядагы атеросклероздук өзгөрүүлөрдү шарттап, кесепети оор болот. Андан дарылануу көп чыгымды талап кылат", — деди Хорошев.
Отуруп иштөөнүн зыянын азайтуу үчүн жумуш ордун ыңгайлуу кылып алуу керек. Мындан тышкары, ар бир жарым саат же бир саат сайын анча оор эмес көнүгүүлөрдү жасап туруу зарыл. Такыр болбоду дегенде туруп, ары-бери басып койсо деле жарайт.
Дагы бир ыкмасы — туруп иштөөгө өтүү. Кардиолог буга иш столунун жанында дайым конторка турган жазуучуларды мисал келтирди.
Асманга ок атылды. Кыргыз-тажик чек арасында кайрадан жаңжал чыкты
(жаңыланган 22:51 25.10.2020)
Тажик жарандары Үч-Төбө айылынан чек ара аркылуу жер алдынан суу түтүк өткөрүп жатканда кыргыз чек арачылары келип, ишти токтотууну талап кылышкан.БИШКЕК, 25-окт. — Sputnik. Кыргыз-тажик чек арасында чатак чыкканын Мамлекеттик чек ара кызматы кабарлады.
Ага ылайык, бүгүн, 25-октябрда, саат 17:00дөр чамасында тажик жарандары Баткен облусунун Үч-Төбө айылынан чек ара аркылуу жер алдынан суу түтүк өткөрүп башташкан.
"Окуя болгон жерге кыргыз чек арачылары барып, тактала элек аймактагы ишти токтотууну талап кылышкан. Бирок тажик тарап баш ийбей кайым айтышкан. Аскер кызматкерлеринин өмүрүн жана саламаттыгын сактоо максатында, ошондой эле абалдын курчуп кетпеши үчүн Кыргызстандын чек арачылары эскертүү иретинде асманга ок чыгарууга аргасыз болушту", — деп айтылат маалыматта.
Учурда түтүк өткөрүү иши токтотулду. Эки өлкөнүн чек ара өкүлдөрү сүйлөшүү жүргүзүүдө. Ага жергиликтүү бийлик органдары менен укук коргоо органдарынын өкүлдөрү катышып жатат.
Мамлекетик чек аранын аталган аймагында абал туруктуу деп бааланды.
Белгилер:
Хабиб мыкты беттеш тартуулаганы үчүн кошумча 50 миң доллар алат
(жаңыланган 18:24 25.10.2020)
Бишкек убактысы менен 25-октябрга караган түнү Нурмагомедов каршылашын экинчи раундда муунтуу ыкмасы менен утуп, чемпиондук наамын сактап калды.БИШКЕК, 25-окт. — Sputnik. Абсолюттук мушкерлер уюму (UFC) россиялык чемпион Хабиб Нурмагомедовго мыкты беттеш тартуулаганы үчүн гонорарынан сырткары бонус берет. Бул тууралуу Дана Уайт маалымат жыйынында айтканын "Известия" жазды.
Нурмагомедов беттешкени үчүн канча сый акы алары белгисиз. Ал эми бонустун суммасы 50 миң долларды түзөт.
Хабибден тышкары ушунча акчаны молдовалык Ион Куцелабаны нокаутка кетирген россиялык Магомед Анкалаев дагы алмакчы.
Макгрегор эзелки атаандашы Нурмагомедовдун Гэтжи менен беттеши боюнча үн катты
Бүгүн түнү Нурмагомедов каршылашын экинчи раундда муунтуу ыкмасы менен утуп, чемпиондук наамын сактап калды. Хабиб бул анын акыркы кармашы болгонун жар салды. Мындай убадасын апасына атасы Абдулманап Нурмагомедов каза болгондон кийин бергенин айтты.
Белгилер:
Тилек Токтогазиев Айыл чарба министрлигиндеги көйгөйлөрдү ачыктады
(жаңыланган 00:23 26.10.2020)
Министрдин айтымында, ведомство Советтер Союзунан бери өзгөрбөгөндөй сезим калтырган. Анда керек болсо жылуулук жок экенин белгилеген.БИШКЕК, 26-окт. – Sputnik. Айыл чарба министрлигинде жаңыланууну талап кылган нерселер көп экен. Бул тууралуу министр Тилек Токтогазиев өзүнүн Facebook баракчасы аркылуу түз эфирге чыгып билдирди.
Ал кыска мөөнөттүн ичинде өзгөртүүлөрдү жасап, анда иштеп жаткан адистерге жакшыраак шарт түзүп берүүгө аракет жасай турганын белгиледи.
35 жашка чыкпай жогорку кызматты ээлеген аткаминерлер. Тизме
“Башка министрликтерге салыштырмалуу бул жактын айлыгы аз экен. Жакшы адистерге жакшы маяна төлөп бергидей кылышыбыз керек. Иштөө шарттары дагы начарыраак экен, мисалы жылуулук жок, суук. Ушунун баарын акырындык менен ордуна алып келебиз. Документтердин бардыгы кагаз түрүндө экен. Аны электрондук форматка өткөрүү зарыл”, - деди министр.
Токтогазиев кагаздар электрондук форматка өтсө ички процесстер, дыйкандарга кызмат көрсөтүүлөр батыраак жүрөрүн кошумчалады. Ал ошондой эле министрликте 888 киши иштей турганын, жалпы ведомство текшерилсин деген буйрук чыгарганын белгиледи.
“Азыр биз аудит баштадык. Жалпы министрлик текшерилсин деп Эсептөө палатасына кат менен кайрылдык. Бүт агенттиктер менен департаменттер текшерилет. Функционалдык анализ жүргүзүлүп, кайсы позициялар керек, кайсылары кереги жок экени аныкталат. Себеби бири-бирин кайталап калган штаттар болушу мүмкүн. Аларды кыскартууга туура келет”, - деди Токтогазиев.
Эң жаш министр алдыда чоң реформаларды жасоо ниети бар экенин кошумчалады.
Белгилер: