Германиянын Мукран порту. Бул жакта Түндүк агым – 2 курулушуна түтүктөр сакталууда. Архивдик сүрөт

Россия Германияга кол суна албайт. Учурдагы жагдайга сереп

(жаңыланган 16:07 15.09.2020)
Өзүң чечим кабыл алууга батына албасаң, жоопкерчиликти башкаларга жүктөйсүң. Берлиндегилер Алексей Навальныйдын ууланышына немистердин реакциясы Россиядан көз каранды экенин айтышууда.

"Биз күн тартибине бардык варианттарды алып чыгабыз, ыңгайлуу учуру келгенде чечим кабыл алабыз. Россия иликтөөгө катышуу менен мындай чечимдин ("Түндүк агым – 2нин" курулушунун токтотулушу жөнүндө – ред.) кабыл алынбашына салым кошо алат", — деп билдирет Германиянын тышкы иштер министри Хайко Маас. Демек, россиялык-германиялык мамиленин келечеги Кремлден көз каранды десек болобу? Ушул маселе жаатында кесиптешибиз Петр Акоповдун макаласына көз чаптырыңыз.

Чоң ката. Германия "Түндүк агым — 2" курулушун токтотуу талабын сындады

Бирок аныгында тарыхый тандоонун алдында Германия жетекчилиги турат. Жакын арадагы аракеттери келечек үчүн аныктоочу, чындап эле тарыхый кесепеттерге алып келиши мүмкүн. Россиялык-германиялык мамилелеринин эмес, Германиянын өзүнүн, демек, бүтүндөй Европанын келечегин аныктайт. Анткени Навальныйдын окуясы – Россия үчүн эмес, Германия жана анын европалык долбоору үчүн текшерүү. Навальныйдын ууланышы дале күдүк жаратат, бирок аны таптакыр башка – геосаясий максатта пайдалануу аракеттери айдан ачык.

Германияны "Түндүк агым – 2ни" токтотууга мажбурлагылары бар. Дээрлик аяктап калган долбоордон толук баш тартуунун кесепеттери олуттуу. Немис экономикасына эмес албетте, курулушка сарпталган он миллиард евро ФРГ үчүн арзыбаган тыйын. Ал эми орус газы баары бир Украина аркылуу жеткирилет. Эгер долбоор токтотулса, эң биринчи Германиянын беделине доо кетет.

Орустар немистердин өз алдынчалыкка умтулуусунан таптакыр көңүлү калат, ал эми англосакстар өз кызыкчылыктарына төп келчү жана акылга сыйгыс чечимдерге түрткүлөп, мурдагы кылымдагыдай эле манипуляциялай аларына дагы бир ирет ынанышат.

Россия ТИМи Берлиндин Навальный тууралуу билдирүүсүнө үн катты

Европалыктардын басымдуу бөлүгү (анын ичинде Россия менен газ долбоорлоруна түздөн-түз катышкан италиялыктар жана австриялыктар) Берлин жалпы европалык кызыкчылыктар менен эсептешүүгө даяр эместигине көзү жетет.

Эң башкысы – немистер өздөрү суверенитетин кайтара албаганына күбө болушат. Андыктан Навальныйдын ууланышына карата немистердин жообунун кесепети биринчи кезекте Германиянын өзү үчүн оор болот.

"Түндүк агым — 2" — бул тек гана маркер, символ. Маастын айткандарына карабай, Россия Берлинге эч кандай жардам бере албайт. Навальныйдын ууланышын иликтөөбүз немис бийлигин өз чечимин кабыл алуу зарылдыгынан куткарбайт. Ал чечим Крымдан кийинки Россия менен болгон санкциялык согуштун башталышынан да кыйла маанилүү болушу мүмкүн.

Соңку жылдары долбоор ишке кирсе, Украина транзиттик акчадан ажырайт деген шылтоо менен англосакстар жана чыгыш европалык сателлиттердин "Түндүк агым – 2ни" токтотуу аракеттерине Берлин туруштук берип келди.

Москва менен Украина аркылуу транзиттин бир бөлүгүн сактап калуу боюнча макулдашылган соң, өз адамдарын эзип, Европада химиялык курал пайдаланган (кеп "Скрипаль иши" жөнүндө) тирандан газ сатып алуу моралга жат дей башташкан. Кийин Германия өз коопсуздугу үчүн аны орустардан коргогон америкалыктарга кем төлөйт, ал эми россиялык газды сатып алат дей башташкан.

Берлиндегилер буларды укканы менен газ түтүгүн курууну уланта беришкен. Улуу Британия Европа биримдигинен чыгып кетти, Америка менен мамилелерде көйгөй көбөйө берди. Мындай кырдаалда германиялык жетекчилик өз кызыкчылыктарын жана бирдиктүү Европаны башкаруу укугун коргоого гана милдеттүү болгон. Анан калса, немис саясатчыларынын баары немистердин көпчүлүгү Германия үчүн негизги көйгөй Россия эмес, Кошмо Штаттар деп эсептешкенин билишет. Андыктан басмырлоого туруштук беришмек.

"Түндүк агым – 2нин" тагдырын "Новичок" чечеби? Геосаясаттын кезектеги көшөгөсү

Навальныйдын окуясын "Түндүк агым – 2нин" тагдырына байлоо аракети башында кезектеги чагымчылык катары сезилген, андай чабуулду Германия жөн эле кайтарып кое алмак. Бирок акыркы үч апта немис басма сөзүндөгү жана саясий чөйрөдөгү ызы-чуу өзгөчө нукта, атлантикалыктар болгон күчүн мобилизациялаган өңдүү.

Мурдагы тышкы иштер министри Йошка Фишер "диктатуралар менен бизнес кылууга кандай моралдык бааны төлөөгө болот?" деп ой толгойт. Маңызында, ал "Түндүк агым – 2нин" токтотулушун талап кылат. "Федералдык өкмөт ЕБ ичиндеги каршылыкка карабастан, бул германиялык-россиялык газ түтүгүн курууга Россияга жалгыз жардамдашуу чечимин кабыл алуу менен стратегиялык ката кетирген. Эми биз саясий жана экономикалык залалдын эбегейсиз экенине күбө болуп отурабыз", – дейт ал.

Ал эми Фишердин мурунку жетекчиси Герхард Шредерден бир пикирге келүүнү талап кылышууда. Бундестагдагы ХДС/ХСС фракциясынын төрагасынын орун басары Йохан Вадефуль мурдагы канцлерди "Россияда ээлеген кызматтарынан ("Норд-Стрим" жана "Роснефть" компанияларындагы) тезинен баш тартууга" чакырат: "Эгер Шредер мырзанын саясий туруктуулугу жана баалуулуктары болсо, анда ал андай өкмөттөрдөн көз каранды болгон компания жана институттар менен мындан ары кызматташпоого тийиш".

Шредерди "Союз-90/Жашылдар" фракциясындагы Геринг-Эккардт да бир зекип алды: экс-канцлер демократия жана адам укуктарын колдор-колдобосу тууралуу бир чечимге келүүгө тийиш.

Кыйын кырдаал: АКШ Россиядан нефть сатып алууга тыюу салмакчы

"Солчулдардын" мурдагы лидери Сара Вагенкнехт Навальный иши боюнча "Түндүк агым – 2" газ түтүгүнөн баш тартууну талап кылгандар Германияны көгүлтүр от менен жабдыган башка өлкөлөрдү да тигил же бул критерийлер менен алардын кесепеттерин кайра карап чыгуу зарылдыгын белгилейт. "Бул ишке Кремль жооптуу болгон күндө да (буга алигүнчө эч кандай тастыктоо жок), Сауд Аравиядагыдай оппозиционерлердин башын алып же өлүмгө жеткиргенче жазалагандай үрөй учурарлык эмес. Ал эми биз андан деле мунай алабыз. Бизге сланецтик газ берген Кошмо Штаттардын кылыгындай, бейкүнөө жай тургундарды учкучсуз аппараттар аркылуу жардырганы жок", – дейт.

Мында кеп кош стандарттарда гана эмес. Навальный окуясында РФ жетекчилигинин дарегине тагылган айыптоолор эле далилсиз болбостон, "ууландыруу" фактысынын чын-төгүнү да белгисиз.

Немис бийлиги РФ тышкы иштер министринин талаптарына жоопту атайын создуктуруп келет. Россиялык ТИМдин билдирүүсү андан да катаал мүнөздө. Элчи Геза Андреса фон Гайрга Германия өкмөтүнүн аракеттери боюнча чечкиндүү протест жарыяланды: "Биздин өлкөнүн дарегине кескин талаптарды жана эч кандай далил менен тастыкталбаган айып тагууга жол берилбейт". Ошондой эле Берлин "бундесвердин врачтарынын" медициналык тыянагы боюнча материалдарды көрсөтпөсө, Москва муну ФРГ бийлигинин акыйкаттыкка жетүү жана калыс иликтөөдөн баш тартуу аракети катары кабыл алары туурасында эскертти.

"Мындай учурда ФРГнын аракеттери Россияга каршы одоно душмандык чагымчылык жана эл аралык кырдаалды олуттуу түрдө татаалдаштыруу катары каралат". Россия мындай жагдайда ушундай кескин эскертүүлөр менен гана кол кабыш кыла алат.

"Оюн жүрүп жатат". ЕБде Беларуска каршы санкциялар эмне үчүн бөгөттөлдү

Ошону менен бирге эле Навальный үчүн "Россияны жазалоо" боюнча чара көрүү чечимин кабыл алууда Берлиндегилер россиялык-германиялык мамилелер жөнүндө эле эмес, Германиянын өзүнүн келечеги өз алдынчалык чыйыры жана бүтүндөй Европага жоопкерчилигин да (ушул нерсе немис саясатынын башкы максаты эмеспи) ойлогону оң.

Катанын кесепети Россия үчүн эмес, анын улуу батыш коңшусунун аброюна доо кетирет.

Белгилер:
Тышкы иштер министрлиги, Алексей Навальный, мамиле, Россия, Германия
Тема боюнча
Чоң ката. Германия "Түндүк агым — 2" курулушун токтотуу талабын сындады
Дүйнө элинин кызыкчылыгы үчүн. АКШ аскерлеринин Германиядан чыгарылышына сереп
Пентагон башчысы АКШ аскерлери Германиядан чыгарын жар салды. Видео

Карга үчүн аппак, кирпи үчүн жумшак... Жаныбарлардын балдары тартылган 15 сүрөт

  • Жаңы туулган баласын кучактап жаткан горилла июнь айында Антверпен (Бельгия) шаарында тартылган
Эң коркунучтуу жырткыч да сүйкүмдүү күчүк болуп төрөлөт. Адамдар алардын айрымдарын зоопарктан көргөндө боору ооруйт.

Кээ бир учурда Кызыл китепке кирген же сейрек кездешүүчү жаныбардын тукуму жарыкка келсе дүйнө жүзү үчүн чоң сенсация болот.

Бул сүрөт түрмөктө жаныбарлардын күчүктөрү кичинекей кезинде кандай болорун көрөсүздөр. Sputnik Кыргызстан сүйкүмдүү 15 сүрөттү сунуш кылат.

 

  • © AFP 2021 / Sebastien Bozon

    Франциянын Мюлуз зоопаркындагы леопарддын күчүгү. Леопард арстан менен жолборско салыштырмалуу кичирээк келет

  • © REUTERS / TT News Agency / Jonas Ekstromer

    Стокгольмдун зоопаркындагы мамалак. Ысыкта ал сууга түшүп сергип жатат

  • Жаңы туулган баласын кучактап жаткан горилла июнь айында Антверпен (Бельгия) шаарында тартылган
    © REUTERS / YVES HERMAN

    Жаңы туулган баласын кучактап жаткан горилла июнь айында Антверпен (Бельгия) шаарында тартылган

  • © AFP 2021 / Guillaume Souvant

    Гиппопотамдын баласы Франциянын зоопаркында 7-июнда туулган. Аны "Мадагаскар" мультфильминин каарманы Глориянын ысымы ыйгарылган

  • © AFP 2021 / Sebastien Bozon

    Игрунка маймыл тукумундагы эң кичинекей жандык деп эсептелет. Анын чоңу куйругун кошо өлчөгөндө 22 сантиметр чыгат. Сүрөт июнь айында Францияда тартылган

  • © AP Photo / Peter Steffen / dpa

    Дарбыз тиштеп алган ак аюунун мамалагына Нана деген ысым ыйгарылган. Ал Ганновердеги (Германия) зоопаркта жашайт

  • © AFP 2021 / Cristina Quicler

    Ак арстандар сейрек кездешкен жандыкка кирет. Ошондуктан анын күчүгүнүн жарык дүйнөгө келишин сенсациялуу окуя деп бааласа болот. Сүрөт Испаниядагы зоопаркта күчүккө сүт берип жатканда тартылган

  • © REUTERS / Daniel Becerril

    Мексикалык карышкырлар тукуму жок болуп кетүү алдында турат. 90-жылдардан тарта бул жандыкты көбөйтүү боюнча программа иштелип чыккан. Бөлтүрүктөрү менен жаткан эне-карышкырдын сүрөтү Сальтильо (Мексика) зоопаркынан тартылган

  • © AFP 2021 / Ashraf Shazly

    Судандагы жапайы айбанаттардын паркында арстан күчүгүн көтөрүп турат. Пандемия убагында бул жерде бир нече арстан жарыкка келген. Азырынча аларды сүрөттөн гана көрүүгө болот

  • © Sputnik / Press service of the Moscow zoo

    Москванын зоопаркында күчүктөрү менен турган Фрея аттуу жапайы ит. Бул жандык көбүнесе үлпүлдөк аюуга окшош. Ал Борбордук жана Түштүк Америкада жашайт

  • © AP Photo / Kerstin Joensson

    Туулганына үч күн болгон керик. Ал 6-июнда Австриянын Зальцбург зоопаркында жарыкка келген

  • © REUTERS / Charles Platiau

    Ымыркайын артына көтөрүп жүргөн лемур. Баласы Франциянын зоопаркында жаз айындагы карантин убагында туулган

  • © AP Photo / Dita Alangkara

    Акыра кичинекей баласынан канчалык чоң экенин көрүңүз. Сүрөт Индонезиянын Жакарта зоопаркында тартылган

  • © Sputnik / Ekaterina Chesnokova

    Бул суматрандык орангутандын баласы Москванын зоопаркында жашайт

  • © AP Photo / Axel Heimken / dpa

    Боор ооруткан сүрөт. Гамбургдун (Германия) жапайы айбанаттар паркында сүлөсүндүн үч мый-мыйынын бири

Белгилер:
зоопарк, Франция, АКШ, жаныбарлар
Тема боюнча
Жамбаштап жатсаң сонун да! Кымыз жыттанган кыргыздын жайлоолору сүрөттө
РФ лидери Владимир Путин Федералдык жыйынга кайрылуусунда

Россия улуттук кызыкчылыгы менен кызыл чекти өзү аныктайт. Путиндин кайрылуусу

РФ лидери Федералдык жыйынга кайрылуу жолдоду. Анда өлкө үчүн маанилүү болгон тармактар камтылган.

Владимир Путин пандемиядан кийин биринчи ирет президенттик кайрылуу жолдоду. Президенттин сөзүнүн урунттуу учурларына РИА Новости сереп салган.

COVID менен күрөш уланып жатканына карабастан, учурда туннелдин аркы учундагы шоола эмес, айттырбай келген апааттан акырындап арылуу аракеттери өтөсүнө чыгып баратканын ишенимдүү айтууга болот. Президент да өз сөзүн дал ушул нерседен баштап, пандемиянын башталышында көпчүлүк абал кандай болуп кетет деп тынчы кетип турганда кооптонгону менен Россия бул сыноодон да өтөт деген ишеними бекем болгонун белгиледи.

Бул сөздөрдө эч кандай өзүнө ашкере ишенүү же өзүн өзү мактоо жок эле, тескерисинче, Путин оор кырдаалда да элдин кайратына, демине ишенерин айткысы келди. Анткени ынтымактуу эл гана кыйынчылыкты жеңет, бул калетсиз сөз. Путин россиялыктар дал ушул ынтымагы менен көптөгөн сыноолордон майышпай өткөнүн эске салып, азыр да "жарандар, коом, мамлекет жоопкерчиликтүү болуп, бир багытта иштегендиктен кырдаалды алдын ала билип-туюп, ошого жараша аракет көрө алганына" токтолду. Биринчи планга үй-бүлө, ынтымак, бири-бирине жардам берүү, мээримдүүлүк, биримдик, башкача айтканда, "прогрессивдүү" индивидуалисттер шакаба чеккен нерселер чыкты. Путин бул бир катар өлкөлөр унутуп бара жаткан руханий байлык, тескерисинче, россиялыктарды бириктирип, күчтүү кылганын жар салып, "ушул баалуулуктар дайым корголорун" айтты.

Куру сөз менен эмес, иш менен, башкача айтканда, үй-бүлөнү жана балдарды социалдык жактан коргоонун жаңы чаралары менен колдоого алынары айтылды. Бул камкордук кризис биринчи кезекте жетишпеген турмушта жашагандарга сезилгени үчүн эмес, жок, бул элди коргоп, көбөйтүүгө багытталган стратегиялык кадам. Путиндин айтымында, мамлекеттик саясаттын артыкчылыктуу багыты.

Коронакризис Россиянын башкы көйгөйү болгон демографиялык маселени курчутту. Президент бул жааттагы абалды өзгөчө деп атап, калктын санын туруктуу көбөйтүүгө жол ача турган бир катар чараларды сунуштады. Маселени чечүү үчүн өкмөт 1-июлга чейин балалуу үй-бүлөлөрдү колдоого багытталган чаралардын бүтүндөй системасын даярдашы керек. Бул жерде башкы милдет — жакырчылыкка жол бербөө, анткени балдардын төрөлүүсүнүн өсүшү ушул нерседен көз каранды.

Путин эмнелерди сунуштады? Биринчиден, кирешеси эки жашоо минимумунан төмөн болгон толук эмес үй-бүлөлөргө 1-июлдан баштап 8 жаштан 16 жашка чейинки балдар үчүн ай сайын төлөм чегерүү. Бул каражат ага чейин белгиленген төлөмдөргө кошумча иретинде берилмекчи. Мындай колдоого башынан эле атасыз өскөн же ата-энеси ажырашкан миллиондогон үй-бүлө ээ болот.

Экинчиден, жети жашка чейинки баласы ооруп калган энеге эмгек стажысына карабастан айлык акысынын 100 пайызы төлөнөт.

Үчүнчүдөн, оор кырдаалга кабылган кош бойлуу келиндерге ай сайын төлөм чегерилет. Болочок эне мамлекеттен моралдык жана медициналык эле эмес, материалдык да колдоо болуп турарын сезиши керек. Мындай кадам биринчи жолу жасалмакчы.

Мындан тышкары, кирешенин көлөмүнө карабай балдарга ай сайын берилүүчү былтыркы төлөмдөр улантылат. Августта ар бир окуучуга 10 миң рублден төлөнүп берилмекчи.

Мындай чаралар маанилүү экени талашсыз, бирок бул жерде тенденциянын өзү башкы маселе. Путин үй-бүлө жана балдарды колдоо саясатын алдыга жылдырууда. Бул боюнча былтыр Конституцияга да өзгөрүүлөр киргенин эске сала кетели. Кийинки кайрылууларда да социалдык колдоонун жаңы формалары кирери шексиз. Анткени ушу тапта үч балалуу үй-бүлө кадыресе көрүнүш катары кабылданган деңгээлге жетүү улуттук кызыкчылык болуп турат. Мунсуз демографиялык өзгөчө кырдаалды "сындыруу" мүмкүн эмес. Эл аралык абал эмес, дал ушул жагдай бүгүнкү күндө Россия үчүн башкы чакырык. Албетте, эл аралык кырдаалдын маанилүүлүгүн четке кагуу болбойт, бирок мындан Россиянын өзүнө тикелей коркунуч жок.

Анткени өлкө ким менен эмне талашып жатканын так билип, өз коопсуздугун, өнүгүүсүн камсыздоого кудурети жетет. Кайрылуунун тышкы саясатка багытталган бөлүмү чакан, бирок эмоционалдуу, ачык болду.

Путин Россия менен өйдөсүнүп, кыр көрсөтүп сүйлөшүү майнапсыз экенин айтты. Өлкө өз позициясы менен кызыкчылыгын коргоо үчүн дайым жол табат. Андыктан президент Россияга чагымчылык кылбоону жана козутпоону талап кылды.

"Айрым мамлекеттер бир нерсе болсо эле, көп учурда эч себепсиз эле Россияны кыпчый кеткен акылга сыйгыс адат таап алды. Ким катуураак кыйкырып чыгат деп жарышкан сыяктуу".

"Токтоолук кылып, сабырдуу болуп жатабыз. Көп учурда көз жаздымда калтырып унчукпай коёбуз. Биз баары менен жылуу мамиледе болгубуз келет. Бирок иш жүзүндө эмне болуп жатканын да көрүп жатабыз: жогоруда айткандай, Россияны жөнсүз эле ар нерсеге кыпчып жатышат. Албетте, алардын айланасына Шерханды тегеректегендей эле "Табакилер" жыйналып, Киплинг айткандай, башчысына дем-күч берүү үчүн улуп-уңшуп турушат. Киплинг улуу жазуучу эле".

"Биз эл аралык аренада бардыгы менен, акыркы убакта тил табыша албай жаткан тараптар менен да жылуу мамиледе болгубуз келет. Таптакыр бет карашпай калгандан алыспыз. Бирок биздин изги ойлорубузду кайдыгерлик же алсыздык катары кабылдагандар же таптакыр алаканы үзмөкчү болгондор Россия токтоосуз жана катуу жооп берерин билиши керек".

Маселенин кабыргасынан коюлганына карабастан Путин дагы түшүнүктүүрөөк болушу үчүн минтип кошумчалады:

"Биздин коопсуздугубузга чагымчылык уюштургандар болуп көрбөгөндөй катуу өкүнөт".

Ошону менен бирге Путин эч кимди коркутуп опузалаган жок, болгону Россиянын улуттук кызыкчылыгы өткөн жерге кызыл чийин чийип жаткандарга жооп гана берди. Кызыл чийин боюнча да сөзү түшүнүктүү болду:

"Россияга карата кызыл чектен өтүү эч кимдин оюна келбейт деп ишенем. Ал чек кай жерде экенин ар бир учурда биз өзүбүз аныктайбыз".

Ооба, Россия улуттук кызыкчылыгы, орус дүйнөсүнүн кызыкчылыгы эмнеде экенин өлкө ичинде да, сыртында да өзү аныктайт. Мындай абал жагышы да мүмкүн, жакпай калышы да ыктымал, бирок моюн сунууга туура келет.

Белгилер:
мамиле, кызыкчылык, колдоо, бала, үй-бүлө, кайрылуу, Владимир Путин, Россия
Тема боюнча
Вакцина келди. Россия берген "Спутник V" "Манаска" түшүрүлгөн видео
АУЦАнын президенти Эндрю Качинс. Архив

АУЦАнын президенти Эндрю Качинс суракка чакырылды

(жаңыланган 19:11 23.04.2021)
Ички иштер министрлиги окуу жайдын жетекчиси каттоого алынган кылмыш ишинин алкагында суракка чакырылганын айтты.

БИШКЕК, 23-апр. — Sputnik. Борбор Азиядагы Америкалык университеттин (БААУ — АУЦА) президенти Эндрю Качинс ИИМдин Тергөө кызматына суракка чакырылды. Бул тууралуу министрликтин маалымат кызматы кабарлады.

Окуу жайдын жетекчиси каттоого алынган кылмыш ишинин алкагында чакырылганы айтылат.

Министрлик сотко чейинки өндүрүш боюнча маалымат Жазык-процессуалдык кодексинин 160-беренесине ылайык ачыкка чыгарылбай турганын кошумчалады.

Белгилер:
сурак, Эндрю Качинс, ИИМ
Тема боюнча
Апкаарып калбаңыз! Суракка чакырылган адам эмнелерди билиши керек