БИШКЕК, 21-фев. — Sputnik. Марс планетасында дагы бир он жылдан кийин адамдар туруктуу жашап калышы мүмкүн. Ал эми 2100-жылы миллиондогон калкы бар шаарга айланат. Мындай пикирин "Марс коомунун" президенти, инженер жана Марсты изилдөө боюнча энтузиаст Роберт Зубрин билдирди.

Белгилей кетсек, америкалык Perseverance изилдегич аппараты 19-февралдын түнү Марстагы Езеро кратеринин аймагына конгон. NASA жүргүзгөн иликтөө миссиясына Марста жашоо барбы деген суроого жооп издеп, баа берүү кирген. Perseverance Жерге алып келген топурак ар тараптуу изилдөөгө алынмакчы.

Окумуштуунун айтымында, азырынча адамдардын Марста жүрүшү илимий фантастика бойдон калууда. Бирок ровер сыяктуу миссия аткаруучу роботтор Марска учуу реалдуу экенин ачыктап көрсөтүүгө жардам берет. Зубрин бул учур 2030-жылга туш келерин болжоп жатат.

Ал эми Илон Масктын 2050-жылы Марска миллион адамды жиберүү боюнча айтканын "дымактуу убада" деп эсептейт.

"Бул жылы миң адамды жөнөтүүгө болот, алар Марста көптөгөн адамдын жашоо шартын камсыздоо үчүн индустриялык жана айыл чарба мүмкүнчүлүктөрүн түзүп турушат. Кызыл планетага адамдар канчалык көп учса жана ошол жактан балдар төрөлсө калктын саны өсүп, 2070-жылы миллиондук шаар же 2100-жылы андан дагы көп болушу ыктымал", — деп айткан Зубрин.

Ошондой эле ал изилдөө учурунда адам өлүмү болобу же жокпу деген суроого эч бир изилдөөдө ири тобокелчиликсиз ийгиликке жетүү кыйын деп жооп берген.

БИШКЕК, 1-мар. — Sputnik. Кыргыз өкмөтү мунай заттарын Евразиялык экономикалык биримдиктин бажы чегинен сырткары ташып чыгууга убактылуу тыюу салууну сунуштап жатат.

Бул боюнча токтом долбоору өкмөттүн сайтына жарыяланды.

Бийлик муну менен Кыргызстандагы күйүүчү-майлоочу майлардын тартыштыгын алдын алууга аракет кылууда.

Эгерде токтом долбоору кабыл алынса, ал үч күндөн соң күчүнө кирип калат. Тыюу салуу ЕАЭБдин мунай жана мунай заттары боюнча жалпы рынокторун түзгөнгө чейин уланышы мүмкүн.

2021-жылдын башынан тарта 1-мартка чейин россиялык өндүрүштөн чыккан бензиндин тоннасы 300 доллардан 500 долларга чейин өскөн. Кымбаттоо 67 пайызды түзүп, орточо эсеп менен алганда күйүүчү майдын литрине 14 сомдон туура келген. Дизель майдын тоннасы 360 доллардан 470ке чыккан. Пайыздык көрсөткүч менен эсептей келгенде 14 болгон. Бул литрине сегиз сом дегенди билдирет.