Кремльдын жанындагы Евробиримдиктин желеги. Архив

"Россияны жазалоо": РФ менен ЕБ алакасы 90-жылдардагы абалдабы?

(жаңыланган 11:22 25.03.2021)
РФ тышкы иштер министри Сергей Лавров Москва менен Брюсселдин "алакасынын инфраструктурасы" Евробиримдик тарабынан бузулганын айтууда. ЕБде Россияга айрым гана мамлекеттер өнөктөш.

Бирок Россия Европадагылар да кааласа байланышты калыптандырууга даяр. Дипломаттар тил табышууга кантип аракет көрүп жатышканына Антон Лисицын сереп салган.

Жылыш жок

Лавровдун пикиринде, ЕБдин кээ бир эле өлкөлөрү улуттук кызыкчылыктарын туу тутуп, Москва менен байланышты кармайт.

"Азырынча "Батыш фронтунда өзгөрүү жок", — деп белгиледи министр. — Чыгышта биздин күн тартибибиз абдан интенсивдүү, жыл өткөн сайын жыш да болуп келет".

Шейшемби күнү россиялык дипломатиянын жетекчиси эгер Евробиримдикте мамилени жөнгө салууну чечишсе, Москва аларды калыптандыруудан качпайт.

"Албетте, биз бирдей укук жана кызыкчылыктардын тең салмактуулугун издөөнүн негизинде бул мамилени бекемдөөгө даярбыз", — деп кошумчалаган ал.

Буга дейре Лавров "заманбап эл аралык аренада кимди болбосун жазалоо дегеле туура эмес, ал эми Россияга жана КЭРге карата мындай тон бычууга тырышуу — бул акылга сыйбас иш".

Андан бир күн мурун европалык дипломатиянын башчысы Жозеп Боррель алакалардагы чыңалуунун күч алышына жоопкерчиликти Москвага оодарган.

"Россия тирешүүгө өткөнү бизге түшүнүктүү", — деп билдирген ал ЕБ Кеңешинин жыйынынан соң. Анын айтымында, "Россия барган сайын Европа биримдигине далысын салууда".

Боррель маалымдагандай, европалык дипломаттар Россия менен мамиледе беш принципти жактай турганы тастыкталды. Атап айтканда, Минск келишимдерин аткаруу, ЕБдин чыгыштагы өнөктөштөрү, башкача айтканда постсоветтик республикалар менен байланышты чыңдоо, жалпы кызыкчылыктарды эске алып Москва менен тандап өз ара аракеттешүү, "россиялык жарандык коомду" колдоо жана Европанын энергетикалык коопсуздугун камсыздоо.

Боррелдин билдирүүсү санкциялар менен коштолду. Маалымат каражаттары Европа биримдиги Алексей Навальный жагдайынан улам россиялык кызматтык өкүлдөргө чара көрөрүн эскертип келишкен. Сот "Ив Роше" иши боюнча шарттуу мөөнөттү жокко чыгарып, аны сыноо кезиндеги эреже бузулардын көптүгүнөн улам жалпы режимдеги колониядагы үч жарым жылга алмаштырган.

Ачыгы, ЕБде күч органдарынын өкүлдөрүнө каршы жеке санкциялар менен чектелип, россиялык экономикага карата чара көргөн жок. Россиянын ТИМинин расмий өкүлү Мария Захарова бул кадамды колдон чыгарылган мүмкүнчүлүк деп атады. "Россия тараптан Европа биримдигинин достукка коошпогон бул акциясына өзүнө шайкеш жооп кайтарылат", — деп белгилейт ал.

Лавров, ошондой эле, Брюсселдин саясатында Москвага дал кайсы нерсе туура келбей турганын кеңири түшүндүргөн: ЕБ "билип туруп эки тараптуу алаканын дээрлик бардык инфраструктурасын талкалаган".

Каршылык көрсөтүү жана Россияны ооздуктоо

ЕБдин Москвадагы өкүлү Маркус Эдерер Боррель менен болгон түшкү тамакта жолугушуусунда Россия менен диалогдо Евробиримдик украиналык жаңжалга кескин басым жасап алган, бул көз карашты өзгөртүү зарыл экенин билдирген. Бул тууралуу Bloomberg агенттигине Еврокомиссиянын басма сөз кызматы кабарлап, кезигүүдө көтөрүлгөн темалар боюнча ооз ачкан эмес. Расмий түрдө тышкы саясат боюнча европалык мекемелердин башчылары кайрадан эле "Москва менен мамиледе беш негизги принциптин жакталышын" айтышты. Аны менен кошо дипломаттар "Россияга жалпы каршы туруу, ооздуктоо жана зарыл жерде өз ара аракеттешүү" боюнча бир пикирге келишти.

Москва Европа кеңеши боюнча да үн катты. Россия ТИМ башчысынын орун басары Александр Грушко Кремль Европа кеңешине мүчөлүгүн баалайт, бирок ал үчүн "каалаган акыны" төлөп, тизе бүкпөйт.

РФ ТИМ алдындагы Москва мамлекеттик эл аралык мамилелер институтунун интеграциялык процесстер кафедрасынын башчысы Николай Кавешников Россия жана ЕБдин ортосундагы өз ара байланыш "90-жылдардын башындагы эң төмөн деңгээлде" экенин айтат.

"Кремлдин көз карашында, жоопкерчилик Европа биримдигинде. Крымдагы жана Донецк, Луганск областтарындагы окуялардан кийин ал санкцияларды киргизип, аларды Россиянын эл аралык аренада жана өлкө ичиндеги аракеттерине өз мамилесин билдирүү үчүн дале пайдаланууда", – дейт эксперт.

Кавешников ЕБдин пикирин да мындайча чечмелейт: "Алардын ою боюнча, 2014-жылы Россия эл аралык укуктук ченемдерге каршы кетип, "зыяндуу ишмердик" жүргүзүүдө".

Кремлдин бир топ кадамын Брюсселдегилер милдеттенмелерди бузуу катары баалайт.

Евробиримдикте Россия менен алаканын бузулушун токтотууга, жок дегенде бизнеске жолтоо болчу багыттарда мамиленин начарлашына жол бербөөгө кызыкдар күчтөр да бар. Бирок Могерининин беш принципти иштеп чыгуусу менен ЕБ ушундай болор-болбос консенсуска келди. Башканы ойлоп табуу алардын колунан келбейт", — деп белгилейт Кавешников.

Анын айтымында, улуттук кызыкчылыктар менен байланышты өнүктүрүү – азыр колго ала турган жалгыз чара. Бирок экономика, инвестиция, тышкы саясат улут үстүндө чечилип, мындан башка жол табуу мүмкүнчүлүктөрү чектелүү.

Саясат таануучу, тарых илимдеринин кандидаты Андрей Суздальцев ЕБ, дегеле батыш өлкөлөрүнүн Россия менен тиреши белгилүү бир алгоритм менен өрчүп жатканын баамдаган.

Акырындап Россияны жазалоо үчүн шылтоолор азаюуда, аны менен катар күн тартибин өзгөртүүгө түртөт деп боолголойт Суздальцев. Кандайдыр бир мааниде тараптар өтүүгө болбой турган кызыл чийинге жетип калышты.

"Мамилелер 90-жылдардагы эң төмөн деңгээлине түштү, бирок биздин көп багытта: экономикалык, социалдык, технологиялык байланыштарыбыз бар. Диалог ошол эле нукта уланып, Россияны кай бир көрүнүшкө айыптуу өлкө көрсөтүп, тарбиялоого тырыша бериши мүмкүн. Ал эми иш жүзүндө алардын көздөгөнү анык: биз рынокко сунуштаган нерсенин баасын төмөндөтүү. Биз алардын айтканы менен болбошубуз керек, бирок бул туруктуулук жана коопсуздукту камсыздабасы түшүнүктүү", — дейт эксперт. Анын пикиринде, чындыгында Европада РФке тагылган айыптоолорго далил келтирүүгө убара да тартып коюшпасы белгилүү болгондо эле диалог токтогон. Москва Брюсселдегилер тынчып, "ачуусу тарап" калганча күтүүдөн башка эмне кылсын, анан да Россиянын ичинде эле иш жетиштүү эмеспи.

Белгилер:
Евробиримдик, күн тартиби, алака, АКШ, Россия, Сергей Лавров
Тема боюнча
ТИМ жетекчиси Лавров ЕБдин Россия менен алакасынын жоюлушу туурасында билдирди
Россияны ооздуктоо боюнча милдеттенмелерден арыла албаган Европа
Саламаттык сактоо министрлигинин Медициналык техника жана дары-дармек менен камсыздоо департаментинин сектор башчысы Майя Мусаева

Мусаева: ЕАЭБде дары-дармекти каттоону бир стандартка алып келүү мөөнөтү узарды

(жаңыланган 23:16 16.04.2021)
Майя Мусаеванын айтымында, өлкөдөгү фармацевтика тармагынын ишин ЕАЭБ принцибине которсок дары рыногу тартипке келип, баа саясаты жөнгө салынат.
Мусаева: ЕАЭБде дары-дармекти каттоону бир стандартка алып келүү мөөнөтү узарды

Евразия экономикалык комиссиясы ЕАЭБ аймагында дары-дармекти каттоону бир стандартка алып келүүнүн мөөнөтүн 2021-жылдын 1-июнуна чейин узартты. Бул тууралуу Саламаттык сактоо министрлигинин Медициналык техника жана дары-дармек менен камсыздоо департаментинин сектор башчысы Майя Мусаева билдирди.

Алгачкы мөөнөт 2020-жылдын 31-декабры деп көрсөтүлгөн.

"Өткөөл мезгилди узартуу ЕАЭБге мүчө-мамлекеттердин саламаттык сактоо тармагынын жаңы дары-дармектерге муктаждыгын толугураак камсыздоого, ошондой эле каттоо досьелерин уюмдун талаптарына ылайык келтирүүгө мүмкүндүк берет. Азыр мамлекеттик реестрде 3500дөй дары-дармек катталган. Бирдиктүү стандартка кирсек дагы башка препараттарды алып келип, дарынын сапатын жакшыртууга шарт түзүлөт", — деди Мусаева.

Анын айтымында, эгерде ЕАЭБдин каттоо эрежелерине ылайык иш алып барсак, дары рыногу тартипке келтирилип, баа саясаты жөнгө салынат.

Мындан тышкары, адис өлкөдөгү фармацевтикалык рыноктун ишин ЕАЭБ принцибине которуу боюнча иш-аракеттер планына ылайык, адистер окуудан өтүшкөнүн кошумчалады.

Белгилер:
Майя Мусаева, стандарт, ден соолук, дары, ЕЭК, Евразиялык экономикалык биримдик
Тема:
ЕАЭБдеги Кыргызстан
Тема боюнча
Новиков дары-дармектин кымбатташына эки фактор таасир этип жатканын айтты
АКШнын Чикаго шаарында көчмө дүкөн бизнесин алгачкылардан болуп ачып, Нarvestrolley компаниясын негиздеген Мирлан Нурматов

Чикагодо алгачкы көчмө дүкөн ачкан Нурматов: жайлоого келчү автолавканы эстедим

(жаңыланган 20:07 16.04.2021)
Түркияда билим алып, аспирантура жана докторантураны аяктап жатып илимий иштерин кыргыз тилиндеги фразеологизмдерди иликтөөгө, которууга арнаган мекендешибиз Мирлан Нурматов учурда Америкада.

Ал АКШнын Чикаго шаарында көчмө дүкөн бизнесин алгачкылардан болуп ачып, Нarvestrolley компаниясын негиздеп отурат.

Sputnik Кыргызстан агенттигинин кабарчысы Мирлан Нурматов менен маектешип, анын ишкерлиги туурасында кеп курган.

— Биз да сиздин ийгилигиңизге абдан кубандык. Куттуктайм! АКШда алгачкылардан болуп өзгөчөлөнгөн бизнес ачыптырсыздар...

— Рахмат, азыр бизнести баштап, иштеп жатабыз. Нarvestrolley (азык-түлүк троллейбусу — ред.) көчмө дүкөн бизнеси чынында Чикагодо жаңылык болуп турат. Негизинен бул жакта деле бала-бакырасы менен үйдө отурган же кандайдыр бир дүкөнгө барууга мүмкүнчүлүгү жок үй-бүлөлөр бар. Буларга да биздин дүкөн ыңгайлуу. Негизинен пандемия көп балалуу үй-бүлөлөргө азык-түлүк алуу жагынан кыйынчылык жаратты. Балдардын баарын бет кап кийгизип дүкөнгө алып баруу өзүнчө бир түйшүк. Анткени Америкада супермаркетке баруу үчүн эки сааттан кем эмес убакыт кетет. Өзүмдүн төрт баламдан улам да мындай түйшүктүн даамын татып калгам. Муну менен катар жолдошу трак айдап иштеген, бала-чакалуу кыргыз келинчектер бар. Жолдошу узак убакытка сапарга чыгып кеткенде балдар менен дүкөнгө баруу аларга да чоң көйгөй жаратат. Мунун баарын көрүп-билип турдум.

Кыргызстанец Мирлан Нурматов, открывший мобильный магазин в американском штате Чикаго
© Фото / из личного архива Мирлана Нурматова
Мекендешибиз Мирлан Нурматов учурда Америкада. Ал АКШнын Чикаго шаарында көчмө дүкөн бизнесин алгачкылардан болуп ачып, Нarvestrolley компаниясын негизде

— Эми өзүңүз тууралуу айта кетсеңиз, Америкага качан, кантип баргансыз?

— Мен Ош облусунун Ноокат районунан болом. Мектепти бүтүргөндөн кийин эле университетте окуу үчүн 2000-жылы Түркияга келгем. Жогорку окуу жайын бүтүргөн соң түркология факультетинде аспирантураны, андан кийин докторантураны окуп бүтүрдүм. Аспирантураны аяктап жатканда диссертациялык ишим катары Кыргызстандагы Кадыралы Коңкобаев агайыбыз баш болгон агай-эжелерибиздин "Кыргыз тилинин фразеологиялык сөздүгү" китебин түрк тилине которгом. Докторантуралык ишимде дүйнөдө жоголуп бара жаткан тилдерди эске алып, кара калпактардын, ногой-татарлардын жана кыпчак тектүү тилдер катары кыргызча, казакчаны кошуп, атайын фразеологиялык сөздүк жазгам. Илимий эмгектеримдин негизи ушундай. Кийин Түркиядагы котормо жаатында мыкты иш алып барган жаштардын тобу менен биргеликте Сагынбай Орозбаковдун вариантындагы "Манас" эпосун которуп, КРдин Ардак грамотасы менен сыйлангам. Бул мен үчүн сыймык болду.

Өзүм үч уул, бир кыздын атасы болом. Келинчегим Бишкектеги Медакадемияны аяктаган соң, Түркияда ординатурадан окуп, ошол өлкөдө жети жыл врач болуп иштеди. Азыр Америкага келгени кайрадан АКШнын дипломун алууга аракеттенип, медициналык тармакта окуп, экзамендерин тапшырып жүргөн кези. Биз АКШга мындан төрт-беш жыл мурда көчүп келгенбиз. Негизинен окуп, иштеген жылдарымды кошкондо Түркияда жалпы 16 жыл жашаптырмын. Докторантурамды аяктаган соң, Анкарадагы Гази университетинде кыргыз, казак, түрк тилдеринен сабак берчүмүн. Убакыттын өтүшү менен түрк туугандардан алчумду алып, үйрөнө турган жакшы жактарын толук өздөштүргөн соң, мындан ары да өзүмдү өстүрүү үчүн сапарымды улашым керек экенин түшүндүм. Ошондон улам Америкага келдим.

Посетитель мобильного магазина в Чикаго кыргызстанца Мирлана Нурматова
© Фото / из личного архива Мирлана Нурматова
Нурматов: кардарларыбыз алгач уюлдук телефонуна атайын тиркеме жүктөшөт. Ал аркылуу дүкөндөгү азыктарды телефонунан толук көрүп, буюртма таштап, дарегин кошо жазып коёт

— АКШга жаңы барганда да бир топ кыйынчылыктарга дуушар болсоңуз керек?

— Бардык нерсени нолдон баштадым. Англис тил курсуна бир жыл барып үйрөнгөн соң, мугалим болуп орношууну максат кылып бир канча университетке документтеримди тапшырдым. Менин кесибим түрколог. Америка менен Түркиянын мамилеси акыркы жылдарда абдан начарлап кеткендиктен көптөгөн түркология факультеттери, бөлүмдөр АКШда жабылып калыптыр. Ошол себептен жакшы жумуш табуу кыйынга турду. Бирок онлайн сабак берип иштеп турдум. Азыр эки студентим бар. Бири түрк тилин, экинчиси кыргыз тилин үйрөнүп жатат.

— Бизнесиңиз тууралуу түшүндүрө кетсеңиз?

— Кардарларыбыз алгач уюлдук телефонуна атайын тиркеме жүктөшөт. Ал аркылуу дүкөндөгү азыктарды телефонунан толук көрүп, буюртма таштап, дарегин кошо жазып коёт. Тапшырыкты алары менен биздин көчмө дүкөн (Нarvestrolley) жарым сааттын ичинде кардардын үйүнүн алдына барат. Кардарлар көчмө маркетке кирип, кааласа кошумча азыктарын ошол жерден да сатып ала алат. Администраторго чалып, телефон аркылуу да буюртма берсе болот. Бул үчүн автобустарды алып, анын ичин атайын жасап, азык-түлүктөрдү жайгаштырдык. Кардар болгону жеткирүү акысына 2 доллар 99 цент (252 сом — ред.) төлөйт. Мындан тышкары, азык кампабызды да ачканбыз. Каалоочулар ал жакка барып да соода кылып кетсе болот. Азыктарды дүңүнөн арзан ала алышат. Кыргыздар этсиз жашай албайт эмеспи. Ошондуктан бизде эттин түрү (баары адал — ред.) бар. Муну менен катар Америкада ар улуттун өкүлдөрү жашайт, алардын табитине жараша ар түрдүү компаниялар менен келишим түзүп, түрдүү азыктарды алдык, толуктап жатабыз. Азырынча он автобус-дүкөн иштеп жатат. Компанияларга жумушчуларды да алып жатабыз.

Посетители мобильного магазина в Чикаго кыргызстанца Мирлана Нурматова
© Фото / из личного архива Мирлана Нурматова
Нурматов: тапшырыкты алары менен биздин көчмө дүкөн (Нarvestrolley) жарым сааттын ичинде кардардын үйүнүн алдына барат

— АКШда мындай дүкөндү биринчилерден болуп сиз ачыптырсыз. Идеяны кайдан алдыңыз?

— Бул идея Кыргызстандан, менин бала чагымдан келген десем болот. Кичинебизде жайкы эс алууда Кара-Суу районунун Папан айылына караштуу жайлоолордо таенемдин колунда көп жүрчүбүз. Ошондо жайлоого атайын көчмө дүкөндөр, автолавкалар келер эле. Раматылык таенебиз ошол дүкөндөн өзүнө керектүү кездеме, жип-шуусун алып, биздин дагы көңүлүбүздү көтөрүп керектүү нерселерибизди сатып берип турчу. Балалык кездеги эң жакшы күндөрдүн бири эле, эсиме түшүп туруп алды. АКШда көчмө дүкөн ачуу идеясынын түпкү теги да таенем менен байланыштуу.

Мындан тышкары, АКШда төрт балам менен үй-бүлөмдү багуу үчүн дагы ишкерлик кылуу керектигин түшүндүм. Ошондон улам кесибим башка болсо дагы бизнес кылуунун жол-жобосун издештире баштадым. Жаштарга айтарым, адамга эң башкысы билим керек. Билимдин кадыры бийик. Билим — адамга алдыга коркпой умтулууга жол ачат. Андан тышкары, көп нерсеге анализ жасоого шарт түзүп, жашоодо көп жеңилдиктерди жаратат. Бул менен өзүңдүн кадыр-баркың да өсөт. 

Кыргызстанец Мирлан Нурматов, открывший мобильный магазин в американском штате Чикаго
© Фото / из личного архива Мирлана Нурматова
Нурматов: кардарлар көчмө маркетке кирип, кааласа кошумча азыктарын ошол жерден да сатып ала алат

— Идеяны ишке ашыруу кыйын болгон жокпу?

— Бул бизнести ишке ашырууда кошумча билим алдым. Айрыкча азык-түлүк тармагында билишим керек болгон көп нерселер бар экен. Ушул тармактан атайын сертификаттарды алуу үчүн окудум. Ар бир азыктын сапатын аныктоодон баштап, кайсы температурада кармоо керектигине чейин үйрөндүм. Керек болсо кайсы азыктарды жакын, чогуу койбош керек экендиги тууралуу билүү абзел экен.

Бул бизнести ачууга алты ай даярдандым. Анткени пандемиядан улам мекемелердин иши солгундап, документтерди бүтүрүү иштери жайыраак болду. Алгач Техаста жашаган досума байланышып, экөөбүз бир катар иштерди жасадык. Анын Техаста кадимки эле дүкөндөрү бар. Идеямды экөөбүз талкуулап, долбоор жаздык. АКШдагы Bank of Amerika деген эң ири банкына барып, алардын башкы каржы адистери менен жолугушканыбызда "мындай бизнес Америкада жок. Эң сонун идея экен. Тезирээк ачкыла, болбосо башкаларга алдырып коёсуңар" дегенде ишти тездеттик. Ошону менен ал досум Техаска, мен Чикагого көчмө дүкөн — Нarvestrolley компаниясын негиздедик.

Кыргызстанец Мирлан Нурматов, открывший мобильный магазин в американском штате Чикаго с посетителем
© Фото / из личного архива Мирлана Нурматова
Нурматов: азык кампабызды да ачканбыз. Каалоочулар ал жакка барып да соода кылып кетсе болот

— Деги эле ал өлкөдө ишкерлик кылууга, ошол эле башка өлкөдөн барган жарандардын бизнес жасоосуна мамиле кандай? Оорчулугу эмнеде?

— Америкада бизнес ачууда эч кандай тоскоолдук болбойт. Компанияны ачып, ага керектүү документтердин баарын даярдап жана текшерүүдөн өткөн соң иштей берүү мүмкүнчүлүгү берилет. АКШда негизинен он миңге чукул кыргыз жараны жашаса, алардын үч-төрт миңге жакыны Чикагодо. Бул жакта кыргыздар үч кафе ачкан. Ал тамактануучу жайларда кыргыз тамактары жасалат. Өзүбүздүн кыргыздар менен кошо америкалыктар да келип, тамактарына ыраазы болуп, сүйүнүп кеткендерин көрөм. Арабызда кыргыздын алмасын, өрүгүн, балын алып келип АКШда сатып иштеген мекендешибиз бар. Ал жигит "Арашан" деген фирма ачып алган. Негизи кыргыздар жалкообуз деп өзүбүздү басмырлаганыбыз менен бул жакта жергиликтүү элге таасирленип, алдыга умтулуп жатышат. Тескерисинче, намыскөй, ишти бат өздөштүрө алат экенбиз. Мындан беш-алты жыл мурда такси айдап иштеген кыргыз балдар азыр эң ири IT компанияларда эмгектенүүдө. Айрым жигиттерибиз трак иштетүүчү компанияларды ачып, оор жүк ташуучу унааларды да сатып алышууда. Бул да болсо кыргыздардын өжөрлүгүнөн кабар берет. Мен да ушул жердештериме таасирленип, ишкерлик баштадым.

— Алдыда кандай пландарыңыз бар?

— Бизге келген кардарлар, ошол эле кыргыздар Кыргызстандан элибиздин нукура азыктарын алып келүүбүздү айтышууда. Ошол себептен, буюрса, чучук, курут, кымыз өңдүү азыктарды алып келүү жагын көздөп жатабыз.

Белгилер:
пандемия, азык-түлүк, бизнес, ишкерлик, көчмө дүкөн, дүкөн, АКШ, Чикаго
Тема боюнча
5000 сом менен баштагам! Кирешелүү бизнес ээси Санжардын маеги
Германияда илимдин доктору болгон Аксана: патриархалдык коомду аялдар кармап турат
Кыз Ысык-Көл тамырын бөтөлкөсүн сүрөткө тартып жатат

Акониттин кайнатмасы мамлекеттик резиденцияда жасалат. Видео

(жаңыланган 23:42 16.04.2021)
Президенттик аппараттан аконит кайнатмасын даярдоочу имарат толук тазаланганын жана тийиштүү деңгээлде жабдылганын билдиришти.

БИШКЕК, 16-апр. — Sputnik. Коронавируска кабылган бейтаптарды дарылоо үчүн жасалуучу "Ысык-Көл тамырынын" кайнатмасы "Ала-Арча" мамлекеттик резиденциясында жасалат. Бул тууралуу президенттик аппараттан билдиришти.

"Мамлекеттик резиденцияда атайын имарат бөлүнүп берилди, ал толук тазаланган жана талаптагыдай жабдылган. Кайнатма чөп ошол жерден жасалат, атайын жабдуу бар. Ал жерде медицина кызматкерлери бар, министр өзү да катышууда. Медиктер 300дөй ыктыярчыны дарылап сакайтты. Саламаттык сактоо министри өзү бул аракетти колдоп, акырындык менен пайдаланылып жатат", — дешти президенттик аппараттан.

Алар кайнатма чөп кустардык ыкма менен куюлбай турганын белгилешти.

Посмотреть эту публикацию в Instagram

Публикация от Садыр Жапаров (@sadyr_japarov)

Буга чейин Садыр Жапаровдун Instagram баракчасында дарыгерлер коронавирустун башталгыч стадиясындагы бейтаптарды айыктыруунун ыкмасын тапканы боюнча билдирүү таратылган. Бүгүн саламаттык сактоо министри суюктук жөнүндө айтып, аны түз эфирден ичти.

"Ысык-Көл тамыры" уусу күчтүү чөптөрдүн катарына кирет. Тажрыйбалуу медиктер коронавирустан мурда бекитилген протоколдун негизинде дарыланууну сунушташууда.

Белгилер:
Ысык-Көл тамыры, уу коргошун, дары, коронавирус, чөп
Тема:
Уу коргошун чуусу
Тема боюнча
Уу коргошун коронавирусту сакайта алабы. Россиялык адистин пикири
Бишкекте киши уу коргошунга ууландыбы? Дарыгерлердин жообу
Барыктабасова: "Ысык-Көл тамыры" элдин саламаттыгын коркунучка кептейт